كِتَابُ فَضَائِلِ الْقُرْآنِ

ف: واضح ہو کہ قرآن کی جن سورتوں کے شروع میں ”الٓر“ ہے وہ پانچ ہیں جو سورۃ یونس (پ11) سے شروع ہو کر سورۃ حجر پارہ (14) میں ختم ہوتی ہیں اور اسی طرح جو سورتیں حٰمٓ سے شروع ہوتی ہیں ان کی تعداد سات ہے جو حٰمٓ المؤمن (پ24) سے شروع ہو کر حٰمٓ الاحقاف (پ26) پر ختم ہوتی ہیں۔

ف: اس حدیث شریف میں مذکور ہے کہ سورہ ”أَلْهٰكُمُ التَّكَاثُرُ“ کو ایک مرتبہ پڑھنے سے ایک ہزار آیتوں کے پڑھنے کا ثواب ملتا ہے اس کی وجہ یہ ہے کہ اس سورہ میں آخرت کی ترغیب اور دنیا کی بے رغبتی کی تاکید مذکور ہے اور یہ قرآن کے چھ (6) اہم مقاصد میں سے ایک اہم مقصد ہے اور حقیقت تو یہ ہے کہ یہ راز ہیں جو بجز شارع علیہ الصلاۃ والسلام کے کسی پر منکشف نہیں اس لئے قیاس کو اس میں دخل نہیں ہے۔ یہ مرقات سے ماخوذ ہے۔12

ف: اس حدیث شریف میں ارشاد ہے کہ سورہ ”قُلْ هُوَ اللّٰهُ أَحَدٌ“ کا ایک دفعہ پڑھنا ثواب میں ایک تہائی قرآن کی تلاوت کے برابر ہے اس بارے میں مرقات نے لکھا ہے کہ قرآن حکیم تین قسم کے علوم پر مشتمل ہے ایک علم توحید، دوسرے علم الشرائع یعنی حلال و حرام کے احکام کا علم اور تیسرے علم تہذیب الاخلاق اور تزکیۂ نفس اور سورہ ”قُلْ هُوَ اللّٰهُ أَحَدٌ“، پہلی قسم یعنی علم توحید پر مشتمل ہے جو باقی تینوں قسموں کے لئے اصل اور بنیاد کا حکم رکھتا ہے اس وجہ سے حضور صلی اللہ علیہ وسلم نے سورہ ”قُلْ هُوَ اللّٰهُ أَحَدٌ“ ایک دفعہ پڑھنے کو ثواب میں تہائی قرآن پڑھنے کے برابر قرار دیا ہے۔12

ف: اس حدیث شریف میں ارشاد ہے کہ ایک صحابی اپنی ہر نماز کی قرأت کو سورۂ اخلاص پر ختم فرمایا کرتے تھے۔ اس بارے میں صاحب مرقات نے کہا ہے کہ وہ صحابی ہر نماز کی آخری رکعت میں سورۂ فاتحہ کے بعد سورۂ اخلاص پڑھا کرتے تھے۔ اور عالمگیریہ میں لکھا ہے کہ کسی بھی نماز کے لئے قرآن کی کسی ایک سورت کو یا کسی ایک حصہ کو معین کرلینا مکروہ ہے۔ امام طحاوی اور اِسْبِیْجَابِی نے کہا ہے کہ یہ کراہت اس وقت ہوگی جب کہ وہ شخص قرآن کی کسی ایک سورت یا کسی ایک حصہ کو نماز میں پڑھنا واجب اور ضروری سمجھے اور اس کے سوا کسی اور سورت وغیرہ کو پڑھنا جائز نہ سمجھے لیکن اگر کسی نے کسی معین سورت کو اپنی آسانی کے لئے پڑھا یا حصول برکت کے لئے یہ سمجھ کر پڑھا کہ حضور صلی اللہ علیہ وسلم اس سورت کو پڑھا کرتے تھے تو اس میں کوئی کراہت نہیں لیکن شرط یہ ہے کہ کبھی کبھی دوسری سورت کو بھی پڑھ لیا کرے تاکہ ناواقف لوگ غلط فہمی میں مبتلا نہ ہوں۔ یہ تبیین میں مذکور ہے۔

ف: علماء نے لکھا ہے کہ جس شخص کو فضائل اعمال کے بارے میں کوئی حدیث ملے تو اس کو چاہئے کہ کم از کم عمر بھر میں ایک مرتبہ اس پر عمل کرے۔ مرقات۔12

ف: امام نووی رحمۃ اللہ علیہ نے لکھا ہے کہ دعاؤں کو دم کر کے پھونکنا مستحب ہے اور اس کے جواز پر جمہور علماء نے اتفاق کیا ہے۔ اور جمہور صحابہ تابعین اور بعد کے علماء نے دعاؤں کے دم کرنے اور پھونکنے کو مستحب قرار دیا ہے۔12

ف(1): صاحب مرقات نے لکھا ہے کہ اس حدیث شریف میں رفع بلیات اور حفظ آیات کے لئے ”قُلْ اَعُوْذُ بِرَبِّ الْفَلَقِ“ کا جو ذکر ہے وہ بطور کفایت کے ہے ورنہ دوسری حدیثوں کے پیش نظر جو ابھی اوپر گزری ہیں قرینہ یہ ہے کہ سورۂ فلق کے ساتھ سورۂ ناس بھی پڑھنا چاہئے۔12 ف(2): صدر کی حدیثوں میں قُلْ اَعُوْذُ بِرَبِّ الْفَلَقِ اور قُلْ اَعُوْذُ بِرَبِّ النَّاسِ کی تلاوت کے لئے بسم الله الرحمن الرحيم کے پڑھنے کا ذکر نہیں ہے اس سے ثابت ہوتا ہے کہ بسم الله الرحمن الرحيم سورتوں کا جزو نہیں ہے اور یہ حدیثیں حنفی مسلک کی تائید کرتی ہیں کہ بسم الله الرحمن الرحيم سورتوں کے درمیان فصل پیدا کرنے کے لئے نازل کی گئی ہے اور سورتوں کا جزو نہیں ہے۔12