Hadith 2969

ابوسعید خدری رضی اللہ عنہ سے روایت ہے وہ فرماتے ہیں کہ رسول اللہ صلی اللہ علیہ وآلہ وسلم ارشاد فرماتے ہیں کہ ہر اس عورت کے لئے جو اللہ پر اور آخرت کے دن پر ایمان رکھتی ہو، جائز نہیں ہے کہ وہ تین دن یا اس سے زیادہ مدت کے لئے (تنہا) سفر کرے مگر یہ کہ اس کے ساتھ اس کا باپ یا بیٹا یا شوہر یا بھائی یا کوئی محرم ہو (محرم وہ شخص ہے جس سے ہمیشہ کے لئے نکاح حرام ہو) اس کی روایت مسلم نے کی ہے۔ اور بخاری کی روایت میں صرف تین دن کا ذکر ہے (یعنی تین دن کے سفر پر جائے تو محرم کو ساتھ رکھے)۔ اور بزّار کی روایت میں ابن عباس رضی اللہ عنہما سے روایت ہے کہ رسول اللہ صلی اللہ علیہ وآلہ وسلم نے ارشاد فرمایا ہے کہ کوئی عورت بغیر محرم کے حج نہ کرے (یہ سن کر) ایک صحابی نے عرض کیا یا نبی اللہ! میرا نام فلاں غزوہ میں لکھا گیا ہے اور میری بیوی نے حج کا ارادہ کر لیا ہے تو حضور صلی اللہ علیہ وآلہ وسلم نے ارشاد فرمایا تُو اپنی بیوی کے ساتھ حج کے لئے چلا جا۔ اور دارقطنی نے بھی ابن جریج سے یہ روایت ان الفاظ کے ساتھ کی ہے کہ کوئی عورت بغیر محرم کے ہرگز حج کے لئے نہ جائے۔ اور طبرانی نے ابو امامہ رضی اللہ عنہ سے روایت کی ہے کہ انہوں نے رسول اللہ صلی اللہ علیہ وآلہ وسلم کو یہ ارشاد فرماتے سنا ہے کہ کسی عورت کے لئے یہ جائز نہیں کہ وہ حج کے لئے جائے جب کہ اس کے ساتھ اس کا شوہر یا کوئی محرم نہ ہو۔ اور بخاری اور مسلم نے بالاتفاق ابو ہریرہ رضی اللہ عنہ سے روایت کی ہے وہ کہتے ہیں کہ رسول اللہ صلی اللہ علیہ وآلہ وسلم نے ارشاد فرمایا ہے کہ کوئی عورت ایک دن رات کے سفر پر روانہ نہ ہو جب کہ اس کے ساتھ کوئی محرم نہ ہو۔