Hadith 3291a

ابو سلمہ رَحْمَةُ اللّٰهِ عَلَيْهِ سے روایت ہے وہ فرماتے ہیں کہ میں نے ام المؤمنین حضرت عائشہ رضی اللہ عنہا سے دریافت کیا کہ نبی کریم صلی اللہ علیہ وآلہ وسلم (کی بی بیوں) کا مہر کیا ہوا کرتا تھا۔ ام المؤمنین نے فرمایا کہ رسول اللہ صلی اللہ علیہ وآلہ وسلم کی بیبیوں کا مہر بارہ اوقیہ اور ایک نش تھا۔ ام المؤمنین نے (ابو سلمہ سے) پوچھا کیا تم جانتے ہو کہ نش کسے کہتے ہیں (ابو سلمہ) کہتے ہیں۔ میں نے جواب دیا نہیں! تو ام المؤمنین نے فرمایا (نُش) آدھے اوقیہ کو کہتے ہیں تو یہ (ساڑھے بارہ اوقیہ چاندی کا سکہ) پانچ سو درہم ہوئے۔ اور نسائی نے اور ابوداود نے ام حبیبہ رضی اللہ عنہا سے روایت کی ہے کہ وہ عبداللہ بن جحش کے نکاح میں تھیں اور ان کا انتقال حبشہ میں ہو گیا تو نجاشی (شاہ حبش) نے عدۃ گزرنے کے بعد حضور صَلَّى اللّٰهُ عَلَيْهِ وَآلِهِ وَسَلَّمَ کی اجازت سے) آپ کا نکاح نبی کریم صلی اللہ علیہ وآلہ وسلم سے کر دیا اور اپنے پاس سے چار ہزار مہر آپ کو دیا۔ اور ایک روایت میں چار ہزار درہم لکھا ہے اور پھر نجاشی نے ام حبیبہ رضی اللہ عنہا کو شرجیل بن حسنہ کے ساتھ مدینہ منورہ روانہ کیا۔