بَابُ تَأْخِيرِ الصَّلَوَاتِ وَتَعْجِيْلِهَا

ف: اس حدیث سے واضح ہوتا ہے کہ صاحب ترتیب کیلئے جس طرح فرض نمازوں کی قضاء کے موقع پر قضاء اور وقتیۂ نمازوں کے درمیان ترتیب کا قائم رکھنا فرض ہے (کہ وہ پہلے قضاء ادا کرے پھر وقتیہ نماز) اسی طرح صاحب ترتیب کیلئے یہ بھی فرض ہے کہ وہ وتر اور فرض نمازوں کے درمیان ترتیب قائم رکھے، مثلاً کسی صاحب ترتیب کی نماز وتر فوت ہوگئی اور فجر کا وقت شروع ہوگیا تو ایسے صاحب ترتیب کیلئے ضروری ہے کہ وہ پہلے وتر کی قضاء پڑھے پھر فجر کے فرض ادا کرے۔ یہ مضمون شرح وقایہ سے ماخوذ ہے۔12

ف: ہمارے علماء نے ان احادیث سے استدلال کیا ہے کہ صاحب ترتیب کیلئے وقتیّہ نمازوں اور قضا نمازوں کے درمیان ترتیب کا قائم رکھنا فرض ہے اس طرح کہ پہلے قضا نماز ادا کی جائے پھر وقتیّہ اور اسی طرح قضا نمازوں کے درمیان بھی ترتیب کا لحاظ رکھنا فرض ہے اگر کسی صاحب ترتیب کی نمازِ صبح فوت ہو جائے اور وہ ظہر تک اسکو ادا نہ کر سکے تو وہ ظہر کے وقت پہلے نمازِ فجر ادا کرے اور اس کے بعد نمازِ ظہر ادا کرے اور اسی طرح کسی صاحب ترتیب کی فجر اور ظہر دونوں قضا ہوں تو اس کو چاہئے کہ پہلے فجر کی قضا ادا کرے پھر ظہر کی قضا ادا کرے۔ صاحب ترتیب کے بارے میں مزید توضیح یہ ہے کہ کسی شخص کی دو یا تین یا چار یا پانچ نمازیں قضا ہو گئیں اور ان نمازوں کے سوا اس کے ذمہ کسی اور نماز کی قضا باقی نہیں ہے۔ یعنی عمر بھر میں سن بلوغ سے کبھی کوئی نماز فوت نہیں ہوئی اور اگر فوت ہوئی تو اس کی قضا کر لی، ایسا شخص صاحب ترتیب ہے اور ایسے شخص کیلئے ادا نماز کا پڑھنا اس وقت تک درست نہیں جب تک وہ ان پانچوں فوت شدہ نمازوں کی قضا نہ پڑھ لیوے اور ایسا شخص ان فوت شدہ نمازوں میں بھی لازماً ترتیب رکھے گا یعنی جو نماز سب سے اول فوت ہوئی ہے، پہلے اس کی قضا پڑھے، پھر اس کے بعد والی، پھر اس کے بعد والی اس طرح ترتیب سے پانچوں کی قضا پڑھے مثلاً کسی سے دن بھر کی پانچوں نمازیں فجر، ظہر، عصر، مغرب، عشاء فوت ہو گئیں تو یہ صاحب ترتیب ہونے کی وجہ سے پہلے فجر، پھر ظہر، پھر عصر، پھر مغرب اور پھر عشاء ترتیب سے پڑھے اگر اس نے پہلے فجر کی قضا نہیں پڑھی بلکہ ظہر قضا پڑھ لی یا عصر کی قضا تو کی یا ان پانچوں نمازوں میں سے بلا لحاظ ترتیب کوئی اور نماز ادا کر لی تو یہ نماز درست نہیں ہوئی اور اس شخص کیلئے اس نماز کو پھر پڑھنا ضروری ہوگا البتہ کسی شخص کی چھ نمازیں فوت ہو جائیں تو ایسا شخص صاحب ترتیب نہیں رہا، اب وہ ان فوت شدہ نمازوں کی قضا سے پہلے ادا نماز پڑھ سکتا ہے اور ایسے شخص کیلئے فوت شدہ نمازوں میں بھی ترتیب ضروری نہیں ہے۔12