Hadith 2732

ف: اس حدیث شریف میں اللہ تعالیٰ کا ارشاد ہے کہ جو میرے کسی ولی کو ایذاء پہنچائے تو میں اس سے اعلان جنگ کرتا ہوں اس بارے میں صاحب مرقات نے فرمایا ہے کہ ائمہ کرام کا ارشاد ہے کہ گناہوں میں صرف دو گناہ ایسے ہیں جس کے بارے میں ایسی سخت وعید وارد ہوئی ہے ایک تو سود خواری اور دوسرے اولیاء اللہ کو ایذاء پہنچانا۔ اس سے معلوم ہوتا ہے کہ یہ دونوں گناہ عظیم خطرہ میں انسان کو پہنچانے والے ہیں۔ اور وہ یہ ہے کہ ایسے شخص کے سوئے خاتمہ کا اندیشہ یقینی ہو جاتا ہے۔ اس لئے کہ اللہ تعالیٰ جس سے جنگ کریں تو پھر اس کو کون بچا سکتا ہے۔12 اس حدیث شریف میں یہ بھی ارشاد ہے کہ جب بندہ نوافل کے ذریعہ مجھ سے قرب حاصل کرتا ہے تو میں اس کو محبوب بنا لیتا ہوں اور اس کی سماعت اور بصارت بن جاتا ہوں۔ الخ اس بارے میں صاحب مرقات نے لکھا ہے کہ: یہاں اس مقام کا بیان ہے جس کو علم سلوک میں فانی فی اللہ اور بقا باللہ کہتے ہیں کہ جب بندہ نفل پر مداومت کرتا ہے تو اللہ تعالیٰ اس کے دل اعضاء اور جوارح کا آنکھ کان ہاتھ پاؤں کا نگہبان ہو جاتا ہے کہ بندہ کو گناہوں سے بچاتا ہے۔ بعض علماء نے یہ بھی فرمایا ہے کہ ایسے مقبول بندہ کے آنکھ، کان اور ہاتھ پاؤں اللہ تعالیٰ کی مرضی کے تابع ہو جاتے ہیں تو ایسے بلند مرتبہ اور قرب الٰہی حاصل کرنے کا ذریعہ دوام نفل ہے اور قرب الٰہی بغیر عبادت کے حاصل نہیں ہوتا۔ تو انسان کو چاہئے کہ عبادت پر کمر باندھے۔12