Hadith 2122

انس رضی اللہ عنہ سے روایت ہے، آپ فرماتے ہیں کہ چند صحابہ کا (رسول اللہ صلی اللہ علیہ وآلہ وسلم کے ساتھ) ایک جنازہ پر سے گزر ہوا (صحابہ کو معلوم ہوا کہ یہ فلاں صاحب کا جنازہ ہے،) تو صحابہ میت کی بہت تعریف کرنے لگے (صحابہ کو میت کی تعریف کرتے ہوئے سن کر) رسول اللہ صلی اللہ علیہ وآلہ وسلم ارشاد فرمائے: اس میت کے لئے واجب ہوگئی، اس کے بعد صحابہ کا (رسول اللہ صلی اللہ علیہ وآلہ وسلم کے ساتھ) ایک دوسرے جنازہ پر سے گزر ہوا (صحابہ کو معلوم ہوا کہ یہ فلاں شخص کا جنازہ ہے) تو صحابہ میت کی برائیاں کرنے لگے (صحابہ کو میت کی برائیاں بیان کرتے ہوئے سن کر) رسول اللہ صلی اللہ علیہ وآلہ وسلم ارشاد فرمائے: اس میت کے لئے واجب ہوگئی، حضور کو یہ فرماتے ہوئے سن کر عمر رضی اللہ عنہ عرض کئے: (یا رسول اللہ! ہماری سمجھ میں نہیں آیا، حضور دونوں کے لئے واجب ہوگئی، واجب ہوگئی، فرمائے تو) کیا چیز واجب ہوئی؟ تو رسول اللہ صلی اللہ علیہ وآلہ وسلم ارشاد فرمائے: پہلی میت کی تم جو تعریف کئے ہو (یہ علامت ہے کہ) وہ میت جنت کی مستحق ہے (اللہ اپنے فضل و کرم سے اس کو جنت دے گا، اس لئے کہ جنت نیکیوں کا بدلہ ہے) اور دوسری میت کی تم جو برائیاں بیان کئے ہو (یہ علامت ہے کہ) وہ میت دوزخ کی مستحق ہے وہ دوزخ میں جائے گی (اس لئے کہ برائیوں کا بدلہ دوزخ ہے۔) صاحبو! تم زمین پر اللہ تعالیٰ کی طرف سے گواہ بنائے گئے ہو (اجتماعی طور پر جو بات تمہارے دل میں آئے، اور جو تمہاری زبان سے نکلے وہ حق ہوتی ہے، اسی لئے میں کہا ہوں کہ پہلے مردہ کی نیکیوں کی وجہ سے تم جو تعریف کئے اس سے اس کے لئے جنت واجب ہوگئی اور دوسرے مردے کی جو تم برائیاں بیان کئے، اس کے لئے میں کہا ہوں، اس کے لئے دوزخ واجب ہوگئی۔ اس لئے کہ تم اللہ کے گواہ ہو۔)۔ اس حدیث کی روایت بخاری اور مسلم نے متفقہ طور پر کی ہے۔ بخاری اور مسلم کی ایک اور روایت میں یوں ہے کہ مسلمان زمین پر اللہ کے گواہ ہیں (اجتماعی طور سے جو اُن کے منہ سے نکلتا ہے وہ حق ہوتا ہے۔) اور حاکم بھی اسی طرح روایت کئے ہیں۔ اور حاکم کی روایت سے معلوم ہوتا ہے کہ رسول اللہ صلی اللہ علیہ وآلہ وسلم ارشاد فرماتے ہیں کہ اجتماعی طور پر مسلمان جو کچھ کہتے ہیں وہ اس لئے حق ہوتا ہے کہ بظاہر تو مسلمان کہتے ہیں، حقیقت میں فرشتے ان کی زبان سے کہلواتے ہیں (اسی لئے ان کا اجتماعی قول حق ہوتا ہے۔) اور حاکم نے کہا ہے کہ یہ حدیث مسلم کی شرط کے موافق صحیح ہے۔