Hadith 3438

براء بن عازب رضی اللہ عنہ سے روایت ہے فرماتے ہیں کہ نبی کریم صلی اللہ علیہ وآلہ وسلم نے حدیبیہ کے دن (مشرکوں سے) تین شرطوں پر صلح کی (1) جو مشرک (مسلمان ہو کر مدینہ منورہ) آ جائے اس کو مشرکین کے پاس واپس کر دیا جائے گا (2) اور جو مسلمان مشرکوں کے پاس چلا جائے تو مشرکین اس کو واپس نہیں کریں گے اور (3) یہ کہ آئندہ سال (عمرہ کی قضاء کرنے کے لئے مکہ معظمہ میں) داخل ہو سکتے ہیں اور صرف تین دن ٹھہر سکتے ہیں۔ (اس صلح کے مطابق) جب آپ (مکہ معظمہ) تشریف لائے اور مدت گزر گئی تو (مدینہ منورہ کی طرف) واپس ہونے لگے تو حضرت حمزہؓ کی صاحبزادی آپ کے پیچھے آنے لگیں اور میرے چچا میرے چچا پکارنے لگیں (یعنی مجھے بھی لیتے چلو) تو حضرت علی رضی اللہ عنہ نے (اپنی سرپرستی میں) لینے کے ارادہ سے اُن کا ہاتھ پکڑ لیا۔ تو حضرت علی، حضرت زید، اور حضرت جعفر رضی اللہ عنہم تینوں (ان کی پرورش کے بارے) میں جھگڑنے لگے حضرت علیؓ نے فرمایا میں نے ان کو (پہلے) لے لیا ہے اور وہ میری چچازاد بہن ہیں (اس لئے میں ان کی پرورش کا زیادہ حق دار ہوں) اور حضرت جعفرؓ نے فرمایا: وہ (بھی) میری چچازاد بہن ہیں اور ان کی خالہ میری بیوی تھیں اور حضرت زیدؓ نے فرمایا وہ تو میری بھتیجی ہیں (یہ سب سن کر) حضور صلی اللہ علیہ وآلہ وسلم نے فیصلہ فرمایا ان کی کفیل ان کی خالہ رہیں گی اور یہ بھی ارشاد فرمایا کہ خالہ ماں کی طرح ہے اور (ان سب کے دلجوئی کے لئے) حضرت علیؓ سے فرمایا تم میرے ہو اور میں تمہارا ہوں اور حضرت جعفرؓ سے فرمایا تم صورت اور سیرت میں میرے مشابہ ہو اور حضرت زیدؓ سے فرمایا تم ہمارے بھائی اور ہمارے محب ہو۔ (اس کی روایت بخاری اور مسلم نے متفقہ طور پر کی ہے)۔