Hadith 1418

ف۔ واضح ہو کہ حضرت معاویہ رضی اللہ عنہ کی اس حدیث سے معلوم ہوتا ہے کہ آپ نے رسول اللہ صلی اللہ علیہ وآلہ وسلم کو عصر کے فرض کے بعد کسی وقت بھی نفل نماز ادا فرماتے ہوئے نہیں دیکھا اور اس حدیث سے پہلے والی حدیثیں جو ام المومنین عائشہ رضی اللہ عنہا اور ام المومنین ام سلمہ رضی اللہ عنہا سے مروی ہیں، ان سے معلوم ہوتا ہے کہ حضور علیہ الصلوٰۃ والسلام نے عصر کی فرض کے بعد نفل نماز پڑھی ہے، بظاہر ان حدیثوں میں تعارض معلوم ہوتا ہے مگر حقیقت میں تعارض نہیں ہے اس لئے کہ حضرت معاویہ رضی اللہ عنہ کا اس بات سے انکار کرنا کہ رسول اللہ صلی اللہ علیہ وآلہ وسلم نے عصر کی فرض کے بعد نفل نماز نہیں پڑھی ہے اس لحاظ سے ہے کہ واقعۃً رسول اللہ صلی اللہ علیہ وآلہ وسلم مسجد میں یا باہر عصر کی فرض کے بعد نفل نماز نہیں پڑھی ہے جس کی وجہ سے حضرت معاویہ رضی اللہ عنہ کو دیکھنے کا موقع نہیں ملا۔ اب رہا حضرت عائشہ اور حضرت ام سلمہ رضی اللہ عنہما کا ارشاد فرمانا کہ رسول اللہ صلی اللہ علیہ وآلہ وسلم نے عصر کے فرض کے بعد نفل نماز پڑھی ہے وہ اس لحاظ سے ہے کہ حضور علیہ الصلوٰۃ والسلام نے ان کے گھروں میں یہ نماز پڑھی ہے اور رسول اللہ صلی اللہ علیہ وآلہ وسلم کا اس نفل کو مسجد میں یا باہر اداء نہ فرمانا اس غرض سے تھا کہ امت اس بارے میں آپ کی اقتداء نہ کرے اور گھر میں اداء فرمانے پر بھی یہ شبہ ہوا کہ کہیں امت اقتداء کرے گی اس لئے ذکوان رضی اللہ عنہ کی حدیث میں صراحت کے ساتھ مذکور ہے کہ حضور علیہ الصلوٰۃ والسلام عصر کے فرض کے بعد نفل نماز پڑھنے سے منع فرمایا کرتے تھے۔