Hadith 2589

29/3064۔ ابو سعید خدری رضی اللہ عنہ سے روایت ہے کہا اُسید بن حُضیر رضی اللہ عنہ نے ان سے بیان سے کیا کہ ایک دفعہ وہ رات میں سورہ بقرہ تلاوت کر رہے تھے کہ اچانک ان کا گھوڑا جو ان سے قریب ہی بندھا ہوا تھا اچھلنے اور کودنے لگا تو حضرت اُسید نے قرآن پڑھنا روک دیا تو گھوڑا بھی خاموش ہو گیا جب انہوں نے پھر تلاوت شروع کی تو گھوڑا پھر اچھلنے بدکنے لگا یہ دیکھ کر انہوں نے تلاوت روک دی تو ادھر گھوڑا بھی خاموش کھڑا ہو گیا۔ حضرت اسید تیسری بار پھر قرآن پڑھنے لگے تو گھوڑا پھر بدکنا شروع کیا۔ یہ دیکھ کر حضرت اُسید اس خوف سے خاموش ہو گئے۔ ان کا بچہ بھی گھوڑے سے قریب ہی سو رہا تھا کہیں گھوڑا اس کو زخمی نہ کر دے جب حضرت اُسید نے اپنے بچہ کو سلا دیا تو اپنا سر آسمان کی طرف اٹھایا تو کیا دیکھتے ہیں کہ ابر کی مانند کوئی چیز سایہ فگن ہے جس میں چراغوں کی طرح کچھ چیزیں روشن ہیں جب صبح ہوئی تو حضرت اسید نے حضور صلی اللہ علیہ وآلہ وسلم کی خدمت میں حاضر ہو کر (یہ واقعہ) عرض کیا تو رسول اللہ صلی اللہ علیہ وآلہ وسلم نے ارشاد فرمایا کہ ابن حضیر کاش تم پڑھتے ہی رہتے۔ اے ابن حضیر کاش تم قرآن پڑھتے ہی رہتے یہ سن کر حضرت اسید نے عرض کیا: یا رسول اللہﷺ! میں ڈر گیا تھا کہ تلاوت کو جاری رکھنے کی صورت میں کہیں گھوڑا میرے بچے یحییٰ کو نہ روند ڈالے جو اس سے قریب ہی سو رہا تھا پس میں قرآن کی تلاوت کو روک کر بچے کے پاس گیا اور آسمان کی طرف اپنا سر اٹھایا تو کیا دیکھتا ہوں کہ کوئی چیز ابر کی طرح سایہ فگن ہے جس میں چراغوں کے مانند کچھ چیزیں روشن ہیں۔ پھر میں باہر نکلا تو دیکھا کہ کچھ بھی نہ تھا حضور نے ان سے پوچھا کہ تم جانتے ہو کہ وہ کیا تھا۔ میں نے عرض کیا: نہیں یا رسول اللہ صلی اللہ علیہ وسلم! تو حضور نے فرمایا سنو وہ فرشتے تھے (جو لطیف اور نورانی اجسام کی شکل میں) تمہاری قرأت سننے کے لئے آئے تھے اگر تم اپنی قرأت جاری رکھتے تو صبح لوگ فرشتوں کو اس طرح دیکھ لیتے تو وہ یعنی فرشتے ان سے پوشیدہ نہ رہتے یعنی لوگ فرشتوں کو برملا دیکھ لیتے)۔ اس کی روایت متفقہ طور پر بخاری اور مسلم نے کی ہے۔