Hadith 3235a

ابوسلمہ بن عبدالرحمن رحمہ اللہ علیہ سے مروی ہے ان کا بیان ہے کہ حضرت عبداللہ بن عباسؓ اور حضرت ابوہریرہ رضی اللہ عنہم سے ایسی حاملہ عورت (کی عدت) کے بارے میں دریافت کیا گیا جس کا شوہر انتقال کر چکا ہو تو حضرت ابن عباسؓ نے فرمایا کہ (ایسی عورت کی عدت) وہ ہوگی جو دو مدتوں میں (یعنی وضع حمل یا چار ماہ دس دن) سے جو مدت آخر میں ختم ہو اور حضرت ابو ہریرہؓ نے فرمایا ایسی عورت کو جب بچہ پیدا ہو جائے تو اس کو (دوسرے سے نکاح کا حق) جائز ہوگا (یہ سن کر) ابو سلمہ بن عبد الرحمٰن ام المؤمنین ام سلمہ رضی اللہ عنہا کی خدمت میں آئے اور اس مسئلہ کو آپ سے دریافت کیا تو ام سلمہؓ نے فرمایا کہ سُبَیعَہ اسلمیہ کو اپنے شوہر کی وفات کے پندرہ دن بعد بچہ پیدا ہوا اور ان کو دو آدمیوں نے اپنے نکاح کا پیام بھیجا ان میں ایک جوان تھا اور دوسرا ادھیڑ، تو انھوں نے اپنا رجحان جوان کی طرف کیا تو ادھیڑ شخص نے کہا (تمہارا عقد کیونکر ہوگا جبکہ) تم نے تو عدت ہی پوری نہیں کی ہے؟ اور ان کے گھر والے (یعنی ان کے ولی) موجود نہیں تھے اور اس (ادھیڑ شخص) کو امید تھی کہ اس خاتون کے گھر والے آ جائیں تو (نکاح کے لئے) اس کو ترجیح دیں گے۔ وہ خاتون رسول اللہ صلی اللہ علیہ وآلہ وسلم کی خدمت میں حاضر ہوئیں اور پورا واقعہ سنایا تو حضور ﷺ نے ارشاد فرمایا تم نے اپنی عدت پوری کرلی ہے تو تم جس سے چاہو عقد کرلو۔ اس کی روایت امام مالکؒ نے موطا میں کی ہے۔