Hadith 3299a

ف: واضح ہو کہ فتاویٰ عالمگیریہ میں تمرتاشی کے حوالہ سے لکھا ہے کہ دعوت کے قبول کرنے میں علماء کا اختلاف ہے۔ ف: واضح ہو کہ دعوت کا قبول کرنا عرف عام میں سنت ہے حالانکہ دعوت کا قبول کرنا واجب بھی ہے، سنت بھی ہے مستحب بھی ہے اور بسا اوقات ممنوع بھی ہے؛ جس کی تفصیل یہ ہے: فتاویٰ عالمگیریہ میں یہ بھی لکھا ہے کہ دعوت قبول کرنے میں علماء کا اختلاف ہے، بعض کے پاس واجب ہے جس کے ترک کرنے کی کوئی صورت نہیں، عامہ علماء کے پاس سنت ہے اور اگر ولیمہ کی دعوت ہو تو افضل یہ ہے کہ قبول کرے ورنہ اختیار ہے لیکن دعوت کا قبول کرنا افضل ہے اس لئے کہ اس سے ایک مومن کو خوشی حاصل ہوتی ہے اور جب دعوت قبول کرلی تو داعی کے گھر جانا چاہئے خواہ کھائے یا نہ کھائے لیکن افضل یہ ہے کہ روزہ دار نہ ہو تو کھالے۔ اور بنایہ میں لکھا ہے کہ دعوت کا قبول کرنا سنت ہے خواہ ولیمہ ہو یا کوئی اور دعوت اور اختیار میں لکھا ہے کہ ولیمہ کی دعوت کا قبول کرنا قدیم سنت ہے اگر قبول نہ کرے تو گنہگار ہوگا اس لئے کہ رسول اللہ صلی اللہ علیہ وآلہ وسلم نے فرمایا ہے جس نے دعوت قبول نہیں کی تو اس نے اللہ اور اس کے رسول کی نافرمانی کی۔ اگر روزہ دار ہو تو دعوت قبول کرے، جائے اور دعا کر کے اور اگر روزہ دار نہ ہو تو کھانا کھائے اور دعا کرے اور اگر کھانا نہ کھائے اور دعوت بھی قبول نہ کرے تو گنہگار ہوگا اور جفا کار سمجھا جائے گا اس لئے کہ اس میں داعی کی توہین ہے حالانکہ رسول اللہ صلی اللہ علیہ وآلہ وسلم نے فرمایا ہے اگر مجھے کھر کھانے کے لئے بھی بلایا جائے تو میں ایسی دعوت کو قبول کروں گا اور رحمۃ الامہ میں لکھا ہے کہ امام ابوحنیفہ رَحْمَةُ اللّٰهِ عَلَيْهِ کے پاس صحیح ترین قول یہ ہے کہ دعوت کا قبول کرنا مستحب ہے۔ اھ حاشیہ مشکوٰۃ میں لمعات کے حوالہ سے لکھا ہے کہ چند ایسے اسباب ہیں جنکی وجہ سے دعوت کا قبول کرنا ساقط ہوجاتا ہے جیسے وہاں شبہ کا کھانا ہو یا وہاں صرف اغنیاء کی دعوت ہو یا وہاں ایسے لوگ ہوں جن کے ساتھ بیٹھنا مناسب نہ ہو داعی نے اس کو اس کی وجاہت دنیوی کی وجہ سے بلایا ہے یا اس لئے دعوت دی ہو کہ اس سے باطل میں اعانت لی جائے یا وہاں غیر شرعی امور ہوں جیسے ریشم کا فرش ہو یا گانے بجانے کی محفل ہو۔12