Hadith 3907

علامہ عینی نے کہا کہ (قیدیوں کے ساتھ) احسان کرنا (بلا فدیہ چھوڑ دینا) ہمارے پاس منسوخ ہے و نیز یہ کہا گیا ہے کہ یہ عمل رسول اللہ صلی اللہ علیہ وسلم کے ساتھ خاص تھا۔ اور اسیران بدر سے متعلق جو آیا ہے وہ سب منسوخ ہے۔ اور امام طحاوی نے کہا ہمارے نزدیک کافر پر مسلمان ہونے کے بعد اپنی نذر (کو پورا کرنا) واجب نہیں ہے اور اس روایت کا مطلب ہمارے پاس استحبابی ہے۔

9قولہ: فربطوه بسارية من سوارى المسجد (پھر انہوں نے اس کو مسجد کے ایک ستون سے باندھ دیا) امام نووی نے کہا ہے کہ اس (حدیث) میں قیدی کو باندھنے اور اس کو قید میں رکھنے اور کافر کو مسجد میں لانے کا جواز ہے۔ انتہی اور ”نفع المفتی والسائل“ میں لکھا ہے کہ امام مالک کے پاس کافر مسجد میں داخل نہیں ہوسکتا کیونکہ وہ جنابت سے خالی نہیں ہوا کرتا ہے۔ اور جنبی کا مسجد میں داخل ہونا ناجائز ہے۔ اور امام شافعی رحمہ اللہ کے نزدیک اس کا صرف مسجد حرام میں داخل ہونا جائز نہیں۔ چنانچہ اللہ تعالیٰ کا ارشاد ہے: ”إِنَّمَا الْمُشْرِكُونَ نَجَسٌ فَلَا يَقْرَبُوا الْمَسْجِدَ الْحَرَامَ بَعْدَ عَامِهِمْ هٰذَا“ ترجمہ: بلاشبہ مشرک ناپاک ہیں، پس اس سال کے بعد وہ مسجد حرام کے پاس نہ آنے پائیں (9-سورہ توبہ، آیت نمبر:28) یعنی اس سال کے بعد جس میں سیدنا ابوبکر رضی اللہ عنہ لوگوں کے امیر حج تھے۔ اور سیدنا علی کرم اللہ وجہہ نے سورہ براءت کا اعلان فرمایا، اور وہ ہجرت کا نواں سال ہے جیسا کہ تفسیر معالم التنزیل میں ہے۔ اور ہمارے پاس اس کا کسی بھی مسجد میں داخل ہونا جائز ہے جیسا کہ ہدایہ میں ہے کیونکہ ان کے اعتقاد کی ناپاکی مسجد کو آلودہ نہیں کرسکتی ہے اور ان کی جنابت (جسم کی ناپاکی) غیر یقینی ہے۔ اب رہی آیت شریفہ تو وہ کفار کے غلبہ کے ساتھ داخل ہونے کی ممانعت پر محمول ہے۔ یا یہ کہا جاسکتا ہے کہ اس میں مسجد حرام میں طواف کے لئے برہنہ داخل ہونے سے منع کرتا ہے۔ چنانچہ ان کی عادت تھی کہ وہ برہنہ طواف کرتے تھے، مرد، دن میں اور عورتیں رات میں اور وہ لوگ یہ کہتے تھے کہ ہم اس لباس میں کیسے طواف کریں جس میں ہم گناہ کرتے ہیں۔ یا یہ کہا جاسکتا ہے کہ اس آیت سے اس سال کے بعد داخل ہونے کی حرمت ثابت نہیں ہو رہی ہے بلکہ مومنین کو اس بات کی بشارت دینا مقصود ہے کہ وہ لوگ اس میں داخل ہونے کی قدرت نہ رکھیں گے۔ (شرح الوقایہ، ہدایہ) 10قولہ: اطلقوا ثمامة الخ (ثمامہ کو رہا کردو) درمختار اور ”ردالمحتار“ میں ہے کہ مال غنیمت سے مجاہدین کا حق وابستہ ہونے کی وجہ سے ان (کفار) کے ساتھ احسان کرنے یعنی ان کو بلا عوض رہا کرنے کو ابن کمال نے حرام کہا ہے اگرچہ ان کے اسلام لانے کے بعد ہی کیوں نہ ہو۔ اور امام شافعی رحمہ اللہ نے اللہ تعالیٰ کے قول: ”فَإِمَّا مَنًّا بَعْدُ وَإِمَّا فِدَاءً“ (47- سورۃ محمد، آیت نمبر:4) یعنی (پھر اس کے بعد یا تو بطور احسان چھوڑ دو یا کچھ مال لے لو) کے پیش نظر اس کو جائز قرار دیا ہے۔ ہم کہتے ہیں کہ یہ آیت منسوخ ہے۔ سورۃ توبہ کی آیت: ”فَاقْتُلُوا الْمُشْرِكِينَ حَيْثُ وَجَدْتُمُوهُمْ“ (9- سورۃ توبہ، آیت نمبر:5) یعنی پس تم (حالت جنگ میں) مشرکوں کو جہاں پاؤ قتل کرو“ سے، اس لئے کہ یہ سورہ آخر میں نازل ہوا ہے (فتح)۔ البتہ زوائدیات میں یہ جو آیا کہ ”آپ ﷺ نے بدر کے موقعہ پر ابو عزۃ جمحی کو بلا معاوضہ رہا فرمایا“ تو یہ نسخ سے پہلے کی بات ہے۔ اور اسی وجہ سے جب وہ جنگ احد میں گرفتار ہوا تو آپ ﷺ نے اس کو قتل فرما دیا۔ اور امام محمد رحمہ اللہ نے ایک دوسرا جواب یہ دیا ہے کہ وہ مشرکین عرب سے تھا اور ان کو گرفتار نہیں کیا جاتا تھا۔ لہذا اس پر احسان کرنے سے مسلمانوں کا ثابت شدہ حق ضائع نہیں ہوتا۔ اور ہم ان کے بارے میں اور مرتد ہوجانے والوں کے بارے میں بھی یہی کہتے ہیں۔ اور اگر مسلمانوں کے کسی فائدہ کی خاطر امام کسی قیدی پر احسان کرنے (بلا معاوضہ رہا کرنے) کے بارے میں غور کرنا چاہے تو اس میں کوئی حرج نہیں۔ اس لئے آپ ﷺ نے ثمامہ بن اثال حنفی پر اس شرط کی بناء پر احسان فرمایا کہ وہ اہل مکہ سے غلہ کو روک لے، تو انہوں نے ایسا ہی کیا چنانچہ وہ لوگ قحط سالی کا شکار ہوگئے۔ (تلخیص از شرح السیر) اور فتح القدیر میں منقول ہے کہ امام مالک اور امام احمد کا قول ہمارے قول کے موافق ہے۔ پھر انہوں نے جمحی کے مذکورہ قصہ وغیرہ سے امام شافعی کے مذہب کی تائید کی ہے۔ اور تم کو اس کا جواب معلوم ہوچکا ہے۔ انتہی۔ اور عمدۃ الرعایہ میں ہے پس اگر تم یہ کہو کہ ان کو غلام بنالینا یا ہمارے ذمی بنائے رکھنا بھی ناجائز ہے اس لئے کہ آیت میں صرف قتل کا ذکر ہوا ہے؟ تو میں کہوں گا کہ ہم نے اس باب میں ظاہر آیت پر عمل جو ترک کیا تو وہ صرف اجماع اور غلام بنانے اور جزیہ مقرر کرنے کے جواز سے متعلق مشہور احادیث کی بنیاد پر ہے۔ 11قولہ: فانطلق الى نخل قريب من المسجد فاغتسل ثم دخل المسجد فقال اشهد ان لا اله الا الله واشهد ان محمدا عبده ورسوله (پس اس نے مسجد کے قریب کھجور کے ایک باغ میں جا کر غسل کیا پھر مسجد میں آ کر کہا ’’اشهد ان لا اله الا الله واشهد ان محمدا عبده ورسوله)۔ امام نووی نے کہا: جب کوئی کافر اسلام قبول کرنے کا ارادہ کرے تو اس میں جلدی کرے اور غسل کے لئے اس کو مؤخر نہ کرے اور کسی کے لئے یہ جائز نہیں کہ اس کو اس میں دیر کرنے کی اجازت دے بلکہ اس میں جلدی کی جائے پھر غسل کیا جائے۔ اور امام شافعی کا مذہب ہے کہ اگر بحالت شرک اس پر جنابت رہی ہو تو اس پر غسل واجب ہے خواہ وہ اس سے غسل کر لیا تھا یا نہیں۔ اور بعض علماء شافعیہ نے کہا اگر وہ غسل کر چکا تھا تو وہ اس کے لئے کافی ہے ورنہ اس پر غسل کرنا واجب ہے اور کچھ دیگر شافعیہ اور بعض مالکیہ نے کہا کہ اس پر کوئی غسل نہیں ہے۔ اور جنابت کا حکم اسلام کی وجہ سے ساقط ہو جاتا ہے۔ جس طرح کہ گناہ ساقط ہو جاتے ہیں۔ اور انہوں نے غسل کو وضوء کے مقابلہ میں مقرر دیا ہے کیونکہ بالاجماع اس پر غسل لازم ہے۔ اور یہ نہیں کہا جائے گا کہ اسلام کی وجہ سے حدث کا اثر ساقط ہو گیا یہ ساری بحث اس وقت ہے جب کہ وہ بحالت کفر جنبی ہوا ہو۔ اب رہا اگر وہ پہلے سے جنابت کی حالت میں نہ تھا پھر اسلام قبول کیا تو اس کے لئے غسل مستحب ہے، واجب نہیں۔ یہ امام شافعی، امام مالک اور دیگر حضرات کا مذہب ہے۔ اور امام احمد وغیرہ کہتے ہیں کہ اس پر (بھی) غسل لازم ہے۔ (مرقات) اور بذل المجهود میں ہے: اور حنفیہ کے پاس اس کا حکم وہ ہے جو منیہ اور اس کی شرح حلبی میں مذکور ہوا ہے ’’اور ان میں سے ایک قسم یعنی غسل کی مستحب ہے اور وہ کافر کا غسل ہے‘‘، شمس الائمہ سرخسی نے اپنی شرح مبسوط میں اس کو ایسا ہی مطلق بیان کیا ہے اور کتاب ’’محیط‘‘ میں انہوں نے یہ بیان کیا کہ کافر کو اگر جنابت ہو جائے پھر وہ اسلام قبول کرے تو صحیح بات یہ ہے کہ اس پر غسل واجب ہے۔ اس لئے کہ جنابت اسلام لانے کے باوجود باقی رہنے والی صفت ہے جس طرح کہ صفت حدث باقی رہتی ہے۔ اور درمختار میں ہے۔ جیسا کہ غسل واجب ہے اس شخص پر جو جنابت کی حالت میں اسلام قبول کرے یا اس عورت پر جو حیض و نفاس کی حالت میں اسلام قبول کرے اگرچہ کہ خون رک گیا ہو صحیح قول کی بناء پر کیونکہ حدث حکمی باقی ہے۔ 12قولہ: وان خيلك أخذتني وأنا أريد العمرة الخ (آپ کے گھڑ سواروں نے مجھے پکڑ لیا حالانکہ میں عمرہ کا ارادہ کئے ہوئے تھا) ”العرف الشذی“ میں ہے کہ حنفیہ کہتے ہیں جو شخص بحالت کفر نذر مانے پھر اسلام قبول کرے تو اس پر نذر کو پوری کرنا واجب نہیں ہے اور شافعیہ نذر کے پورا کرنے کو واجب قرار دیتے ہیں اور وہ اسی حدیث سے استدلال کرتے ہیں۔ ہم کہتے ہیں استحباب کی تو ہم نفی نہیں کرتے ہیں۔ اور ہمارا کلام وجوب سے متعلق ہے اور اس کے وجوب کی بابت کوئی نص نہیں ہے۔ 13قولہ: لا تاتيكم من اليمامة حبة حنطة الخ۔ ترجمہ (تمہارے پاس یمامہ سے گیہوں کا کوئی دانہ نہیں آئے گا) ہدایہ میں ہے: حربی لوگ جب امن مانگ کر آ جائیں تو ان کو ہتھیار نہیں پہنچایا جائے اور دارالحرب کو جانے والے تاجرین کے ساتھ ان کے لئے سامان ضرورت نہیں بھیجا جائے۔ اس لئے کہ آپﷺ نے حربیوں کو ہتھیار بیچنے اور ان کے پاس ہتھیار لے جانے سے منع فرمایا ہے۔ ابن ہمام رحمہ اللہ نے کہا معروف بات تو وہ ہے جو بیہقی، مسند بزار اور معجم طبرانی میں عمران بن حصین رضی اللہ تعالیٰ عنہ سے مروی ہے کہ رسول اللہ صلی اللہ علیہ وسلم نے فتنہ (جنگ) کے زمانے میں ہتھیار بیچنے سے منع فرمایا۔ بیہقی نے کہا: درست بات تو یہ ہے کہ وہ موقوف ہے۔ صاحب ہدایہ نے کہا ہے کہ اناج کے متعلق بھی یہی قیاس ہے۔ یعنی اناج کے بارے میں قیاس یہ ہے کہ اس کو دارالحرب لے جانے سے منع کیا جائے۔ اس لئے کہ اسی سے ہر چیز پر قوت حاصل ہوتی ہے جب کہ یہاں ان کو کمزور و ناتواں کرنا مقصود ہے۔ مگر یہ کہ ان کے پاس اناج منتقل کئے جانے کا ثبوت، ہم کو نص سے یعنی حدیث ثمامہ اور حدیث اسامہ سے ہوا ہے۔ 14 قوله : ففداه رسول الله صلى الله عليه وسلم بالرجلين اللذين اسرتهما ثقيف (پس رسول اللہ صلی اللہ علیہ وسلم نے اس کو ان دو آدمیوں کے فدیہ میں رہا فرمایا: جن کو ثقیف نے گرفتار کرلیا تھا)۔ اور رد المحتار میں ہے کہ ان (کفار) کو ان سے کوئی بدل یعنی مال کے یا مسلمان قیدی کے بدلے رہا کرنا حرام ہے۔ پس پہلی صورت مشہور قول میں ناجائز ہے۔ اور سیر کبیر کی روایت کے مطابق بوقت ضرورت اس میں کوئی حرج نہیں اور امام محمد نے فرمایا اس میں کوئی حرج نہیں بشرطیکہ وہ (کافر) اس درجہ میں ہو کہ اس سے نسل کی امید نہ ہو جیسا کہ شیخ فانی ہے۔ (الاختیار) اب رہی دوسری صورت تو وہ ان کے پاس ناجائز ہے۔ اور شیخین کے پاس جائز ہے۔ اور کتاب ”انوار“ کے مطابق یہاں قول ثانی صحیح ہے۔ لیکن محیط میں ہے کہ ظاہر الروایہ کے مطابق (مسلمان کے فدیہ میں کافر کو رہا کرنا) جائز ہے۔ اور اس کی تفصیل قہستانی میں ہے اور زیلعی نے بھی سیر کبیر سے نقل کیا ہے کہ امام اعظم ابو حنیفہ رحمہ اللہ کی دو روایتوں میں اصح روایت میں اس کا جواز ہے۔ اور فتح القدیر میں ہے کہ وہی (جواز) صاحبین اور ائمہ ثلاثہ کا قول ہے۔ ونیز صحیح مسلم وغیرہ میں رسول اللہ صلی اللہ علیہ وسلم سے ثابت ہے کہ آپ ﷺ نے دو مسلمان آدمیوں کو ایک مشرک کے بدلہ میں اور کچھ مسلمانوں کو جو مکہ میں گرفتار کر لئے گئے تھے، ایک عورت کے بدلے میں چھڑا لیا۔ میں کہتا ہوں کہ ایسی بنیاد پر متون کی عبارت ”حرم فداؤهم“ یعنی (ان کافروں کو رہا کرنا حرام ہے) بلا ضرورت مال کے بدلہ رہا کرنے کے ساتھ مخصوص ہے۔ البتہ مال کے بدلہ بوقت ضرورت رہا کرنا یا مسلمان قیدیوں کے بدلہ رہا کرنا تو جائز ہے۔ انتهى۔ اور رد مختار میں ہے اور اس بارے میں ائمہ کا اتفاق ہے کہ کافروں کو عورتوں، بچوں گھوڑوں اور ہتھیار کے بدلے میں رہا نہیں کیا جائے گا۔ مگر بوقت ضرورت جائز ہے اور مسلمان قیدی کے بدلے کسی ایسے قیدی کو رہا کیا جائے گا جو (ابھی) مسلمان ہوا ہے مگر یہ کہ اس کے اسلام پر اطمینان حاصل ہو جائے تو جائز ہے۔ 15قولہ: وابی ان یردهم الخ (آپ ﷺ نے ان کو واپس کرنے سے انکار فرما دیا) بذل المجهود میں ہے امام اعظم ابو حنیفہ اور ان کے اصحاب کا مذہب اس بارے میں وہی ہے جس کو صاحب ہدایہ نے بیان کیا ہے کہ جب کسی حربی کا غلام مسلمان ہو کر ہمارے پاس آ جائے یا دار الحرب کے خلاف خروج کرے تو وہ آزاد ہے۔ اور اسی طرح جب ان کے غلام مسلمانوں کے لشکر میں مل جائیں تو وہ اس روایت کی بنیاد پر آزاد ہیں کہ طائف کے کچھ غلام مسلمان ہو کر رسول اللہ صلی اللہ علیہ وسلم کی خدمت میں آ گئے تو آپ ﷺ نے ان کی آزادی کا فیصلہ دیا اور فرمایا کہ وہ اللہ کے آزاد کردہ ہیں۔ 16قولہ: وذلک یوم الفتح الخ (اور وہ فتح مکہ کے دن ہوا) فتح مکہ کے بارے میں علماء کا اختلاف ہے۔ چنانچہ امام شافعی رحمہ اللہ کے پاس وہ صلح سے فتح ہوا۔ اور ہمارے پاس وہ غلبہ سے فتح ہوا ہے۔ اور ہماری حجت یہی آیت (مذکورہ) ہے۔ اور امام اعظم ابو حنیفہ رحمہ اللہ کا مذہب یہی ہے۔ اسی لئے حنفی مفسرین میں سے صاحب کشاف اور حنفی مفسرین میں سے صاحب مدارک نے اس توجیہ کو مقدم رکھ کر اس بات کی صراحت کی کہ اس باب میں یہ امام اعظم ابو حنیفہ رحمہ اللہ کی دلیل ہے۔ اور صاحب ہدایہ رحمہ اللہ نے ”باب العشر و الخراج“ میں فرمایا ”اور ہر وہ زمین جو غلبہ سے فتح کی جائے“ اور اس کے باشندوں کو اس پر برقرار رکھا گیا ہو تو وہ خراجی زمین ہے اور پھر انہوں نے یہ کہا کہ اور مکہ مکرمہ اس حکم سے مستثنیٰ ہے اس لئے کہ رسول اللہ صلی اللہ علیہ وسلم نے اس کو غلبہ سے فتح کر کے اہل مکہ کے لئے چھوڑ دیا اور کوئی خراج مقرر نہیں فرمایا“۔ یہ ان (صاحب ہدایہ) کے الفاظ تھے۔ اور ایک قول میں کہا گیا کہ یہ غزوہ حدیبیہ۔۔۔ ...... کے وقت تھا فتح مکہ کے وقت نہیں۔ یہی وجہ ہے کہ صاحب بیضاوی رحمہ اللہ نے اپنے مذہب کی رعایت میں اس (قول) کو مقدم کیا اور امام اعظم ابوحنیفہ رحمہ اللہ کی توجیہ کو اس بناء پر ضعیف قرار دیا کہ یہ سورہ فتح مکہ سے پہلے نازل ہوئی۔ اور میں کہتا ہوں اس (آیت) میں (گزشتہ واقعہ کی) کوئی خبر نہیں ہے۔ اس لئے کہ اس میں ماضی کے صیغہ سے بیان کردہ تمام احکام امت کے (آئندہ واقعات سے) متعلق خبر ہیں جو اظہار غیب میں رسول اللہ صلی اللہ علیہ وسلم کا ایک معجزہ ہے، جیسا کہ ان کی کتب میں ثابت ہے۔ (ملخص از: تفسیرات احمدیہ) اور ”فتح القدیر“ میں ہے کہ اراضی (مفتوحہ) (مکہ) کی تقسیم ضروری نہیں ہے۔ اس لئے کہ مکہ غلبہ سے فتح ہوا اور نبی اکرم صلی اللہ علیہ وسلم نے اس کی زمین کو تقسیم نہیں فرمایا۔ اور اسی بناء پر امام مالک رحمہ اللہ کا مذہب یہ ہے کہ محض فتح سے زمین مسلمان کے لئے وقف ہوجاتی ہے۔ اور وہ (امام مالک) اخبار و آثار کی روایت تامہ رکھتے تھے۔ اور ان (شافعیہ) کا یہ دعویٰ کہ مکہ مکرمہ صلح سے فتح ہوا، اس پر کوئی دلیل نہیں ہے بلکہ اس کی ضد پر دلیل ہے۔ چنانچہ (کیا آپ نہیں دیکھتے) کہ صحیح میں حضور علیہ الصلوٰۃ والسلام کا یہ ارشاد ثابت ہے ”جو ابوسفیان کے گھر داخل ہو وہ مامون ہے اور وہ جو اپنے دروازے کو اپنے لئے بند کرلے وہ مامون ہے“ اور اگر وہ صلح سے ہوتا تو وہ سب اس کی وجہ سے امان میں ہوجاتے اور امان دینے کی ضرورت ہی نہ رہتی۔ اور نہ ام ہانی رضی اللہ عنہا کو اس شخص کو پناہ دینے کی ضرورت پیش آتی جس کو وہ پناہ دیں اور نہ اس کے قتل سے سیدنا علی رضی اللہ عنہ کو روکنے کی۔ و نیز آپ ﷺ نے سیدنا علی رضی اللہ عنہ کو ابن خطل کے (مسجد حرام میں) داخل ہونے کے بعد اس کو قتل کرنے کا حکم دیا۔ حالانکہ وہ غلاف کعبہ سے چمٹا ہوا تھا۔ اور سب سے واضح دلیل بخاری و مسلم میں مذکور آپ ﷺ کا یہ ارشاد ہے ”یقیناً اللہ تعالیٰ نے مکہ کو اس روز حرم بنایا جس دن کہ اس نے آسمانوں اور زمین کو پیدا فرمایا یہاں خون نہیں بہایا جائے گا۔ (یہ طویل حدیث ہے جس کے اخیر میں ہے) پس اگر کوئی رسول اللہ صلی اللہ علیہ وسلم کے قتال سے رخصت (جواز) کو نکالے تو تم اس سے کہہ دو کہ اللہ نے اپنے رسول کو اجازت دی اور تم کو اجازت نہیں دی۔ پس آپ ﷺ کے ارشاد میں ”رسول اللہ صلی اللہ علیہ وسلم کے قتال کا لفظ“ اس بارے میں صریح ہے۔ 17قولہ : ما انتم باسمع لما اقول منهم (میں جو کہہ رہا ہوں اس کو تم ان سے بڑھ کر سننے والے نہیں ہو) اس سے یہ بات ثابت ہوتی ہے کہ مردہ سنتا ہے۔ لیکن ہمارے ائمہ اعلام کی طرف یہ منسوب ہے کہ وہ حضرات سماع اموات (مردوں کے سننے) اور ان کی فہم و ادراک کا انکار کرتے ہیں۔ اور ہمارے اصحاب (حنفیہ) میں سے اصحاب فتوٰی کی ایک جماعت نے اس کی صراحت کی ہے۔ اور انہوں نے اس کو اللہ تعالیٰ کے قول: ”فَإِنَّكَ لَا تُسْمِعُ الْمَوْتَىٰ“ (30-سورة الروم، آیت نمبر:52) سے مؤید کیا۔ اور حدیث ”مَا أَنْتُمْ بِأَسْمَعَ مِنْهُمْ“ کا جواب یہ دیا کہ سیدتنا عائشہ رضی اللہ عنہا نے اس کو رد کر دیا۔ اور اس مقام میں کئی مباحث ہیں۔ 1-پہلی بحث یہ ہے کہ ان حضرات نے یہ جو ذکر کیا کہ ”میت کو تکلیف نہیں ہوتی“ یہ ان احادیث کے خلاف ہے جو یہ بتاتی ہیں کہ میت کو اس چیز سے تکلیف ہوتی ہے جس سے زندہ کو تکلیف ہوتی ہے۔ جیسا کہ امام سیوطی رحمہ اللہ نے اپنی کتاب ”شرح الصدور“ میں ذکر کیا ہے۔ 2-دوسری بحث یہ ہے کہ میت کی زیارت کے باب میں ان حضرات کا یہ قول کہ ”میت کی زیارت در حقیقت اس کی قبر کی زیارت ہے نہ کہ اس میں مدفون کی“ یہ مخالف ہے اس حدیث کے کہ ”جو شخص میرے پاس زیارت کی نیت سے آئے اس حال میں کہ اس کو میری زیارت کے سوا کوئی اور حاجت نہ لے آئی ہو، تو مجھ پر یہ حق ہے کہ میں قیامت کے روز اس کی شفاعت کروں“ ونیز آپ ﷺ کی ان احادیث کے خلاف ہے جو یہ بتاتی ہیں کہ مردہ اپنے زائر سے انس حاصل کرتا ہے اور اس کے سلام کا جواب دیتا ہے۔ ونیز اس شخص کو پہچانتا ہے جس کے اور خود اس کے درمیان جان پہچان...... ...... رہی ہو۔ اور اس طرح کی بہت ساری روایتیں کتب حدیث میں مذکور ہیں۔ 3- تیسری بحث یہ ہے کہ (میت کے) کلام کرنے کی بابت ان حضرات کا قول ان احادیث صحیحہ کے خلاف ہے جو یہ بتاتی ہیں کہ مردہ، اس کو سلام کرنے والے کے سلام کو سنتا ہے اور سلام کا جواب دیتا ہے اور زندوں کے کلام کو سمجھتا ہے اور یہ روایتیں صحیحین اور دیگر کتب صحاح میں ہیں۔ البتہ سیدتنا عائشہ رضی اللہ عنہا نے جن بعض احادیث کو رد کیا تو جمہور صحابہ اور ان کے بعد کے بزرگوں نے اس کا اعتبار نہیں کیا۔ رہا اللہ تعالیٰ کا ارشاد: ”فَإِنَّكَ لَا تُسْمِعُ الْمَوْتَىٰ“ (30۔ سورۃ الروم، آیت نمبر:52) کہ (آپ مردوں کو نہیں سنا سکتے ہیں) اس میں سنانے کا انکار ہے نہ کہ سننے کا۔ علاوہ ازیں ایک درست بات یہ ہے کہ ”الْمَوْتَىٰ“ (مردوں) سے مردہ دل لوگ مراد ہیں۔ اور وہ کفار ہیں۔ نہ کہ عرفی اموات۔ اور اگر تم اس بحث کی تفصیل چاہتے ہو تو میرے رسالہ ”تذکرۃ الراشد برد تبصرۃ الناقد“ کو دیکھو۔ اور اگر طوالت کا اندیشہ نہ ہوتا تو میں یہاں کسی قدر تفصیل سے بیان کرتا۔ اور جو توضیح اور تنقیح کا خواہشمند ہے تو وہ میری شرح کبیر کی طرف رجوع کرے۔ مختصر یہ ہے کہ میت کے سماع اور اس کے ادراک و فہم اور تکلیف کو پانے کی نفی پر کتاب و سنت کی کوئی مضبوط دلیل نہیں ہے۔ بلکہ واضح صحیح احادیث ان امور کے اس کے لئے ثابت ہونے کو بتاتی ہیں۔ اور حق تو یہ ہے کہ ہمارے ائمہ ان امور کے انکار سے بری ہیں۔ اور انہوں نے یہ حکم لگایا ہے کہ میت کو مارنے اس سے گفتگو کرنے اور اس کے پاس داخل ہونے اور اس جیسی چیزوں کے بارے میں قسم کھائے اور یہ باتیں پائی جائیں تو وہ حانث (قسم توڑنے والا) نہیں ہوگا۔ اس لئے کہ قسم کا مدار عرف پر ہے اور عرف میں ان امور سے مراد ان کا زندگی کی حالت میں پایا جانا ہے نہ کہ موت کے بعد۔ پس میت سے کلام کرنا اگرچہ فی الحقیقت وہ کلام ہے اور اس میں میت کو سنانا اور سمجھانا پایا جاتا ہے لیکن عرف میں ”لما اکلمک“ کے قول سے حالت حیات میں کلام مراد ہے اسی طرح ایلام یعنی تکلیف دینے کا مسئلہ ہے اگرچہ میت کے لئے یہ متحقق ہے لیکن عرف کا فیصلہ یہ ہے کہ اس کے قول ”لا اضربک“ (میں تجھ کو نہیں ماروں گا) سے مراد حیات کی حالت میں مراد ہے۔ مرنے کے بعد مارنا مراد نہیں ہے۔ خلاصہ یہ ہے کہ ان قسموں کو مقید کرنا یہ عرف کے حکم کی بناء پر ہے۔ اس بناء پر نہیں ہے جس کا انہوں نے ذکر کیا ہے۔ (عمدۃ الرعایۃ) 1قولہ: قام يصلى ثمانى ركعات (کھڑے ہوئے اور آٹھ رکعات پڑھے) یعنی چاشت کی نماز۔ اور صاحب درمختار نے کہا قول صحیح کے مطابق چار رکعات یا اس سے زائد چاشت کے وقت میں مستحب ہیں۔ اس کا وقت طلوع سے زوال تک ہے اور اس کا وقت مختار دن کا چوتھائی حصہ گزرنے کے بعد ہے اور منیہ میں ہے اس کی کم از کم دو رکعتیں ہیں اور زیادہ سے زیادہ بارہ رکعتیں ہیں اور ان میں بہتر آٹھ رکعتیں ہیں اور یہی افضل ہے جیسا کہ ”ذخائر اشرفیہ“ میں ہے اور یہ حضور صلی اللہ علیہ وسلم کے قول و فعل سے ثابت ہونے کی بناء پر ہے اور زیادہ سے زیادہ جو تعداد ہے وہ صرف آپ ﷺ کے قول مبارک کی بناء پر ہے اور یہ سب اس وقت ہے جب کہ وہ اکثر (بارہ رکعات) کو ایک سلام سے پڑھنا چاہے۔ ورنہ اگر الگ الگ پڑھے تو ہر وہ عدد جو زیادہ ہو افضل ہے۔ (شرح البخاری، ابن حجر) 2قولہ: ملتحفا فى ثوب (ایک کپڑا لپیٹے ہوئے) اس سے معلوم ہوتا ہے کہ ایک کپڑے میں نماز پڑھنا جائز ہے اور امام طحاوی نے فرمایا ہے کہ یہ امام اعظم ابوحنیفہ، امام ابو یوسف اور امام محمد رحمہم اللہ کا قول ہے۔ صاحب عرف شذی نے کہا ہے کہ باب کا خلاصہ یہ ہے جیسا کہ امام طحاوی نے فرمایا شارع علیہ السلام کی غرض یہ ہے کہ کپڑا لٹکتا ہوا نہ ہو۔ اگر وہ زیادہ چوڑا ہے تو اس کو لپیٹ لے اور اس کو ”مخالفة بين الطرفين“ (دونوں کناروں کو دو مخالف جانب پر ڈالنا) اور التحاف و اشتمال کہتے ہیں اور وہ کم چوڑا ہو تو لنگی پر گرہ لگائے۔ ورنہ تہبند باندھ لے پھر احناف نے صراحت کی ہے کہ اشتمال صما یعنی یہودی کی طرح ایک کپڑے میں (اس طرح لپیٹ لے کہ ہاتھ کپڑے سے باہر نکالنا دشوار ہو) مکروہ ہے، اور دو کپڑے ہوں تو اس میں کوئی حرج نہیں ہے۔ 3 قوله: قد اجرنا من اجرت (تم نے جس کو پناہ دی ہے، ہم نے اس کو پناہ دی) صاحب درمختار نے کہا ہے کہ ہم اس کو قتل نہیں کریں گے جس کو کسی آزاد مرد یا آزاد عورت نے امن دیا ہو، قَدْ أَجَرْنَا مَنْ أَجَرْتِ اگرچہ وہ امن دینے والا فاسق ہو یا نابینا یا بہت ہی بوڑھا یا وہ بچہ یا غلام ہی کیوں نہ ہو جس کو جنگ میں شریک ہونے کی اجازت دی گئی ہے اور ان کا امان دینا کسی زبان میں بھی کیوں نہ ہو اگرچہ وہ اس کو نہ جانتے ہوں جب کہ مسلمان اس سے واقف ہوں بشرطیکہ وہ مسلمانوں سے اس کو سنتے ہوں۔ پس اگر وہ ان سے دوری پر ہوں تو ان کے لئے امان نہیں ہے۔ اور صریح الفاظ سے بھی امن درست ہے جیسے، “آمنت” (میں نے امان دی) یا ”لا باس علیکم“ (تم پر کوئی حرج نہیں ہے) اور الفاظ کنایہ سے بھی امان درست ہے جیسے ”تعال“ (آؤ) جب کہ وہ اس کو امان سمجھے اور آسمان کی طرف انگلی سے اشارہ کرنے بھی۔ 4 قوله: لا يصح امان العبد (ایسے غلام کا امن دینا جس کو (تصرف سے) روک دیا گیا ہے) الخ صاحب مرقات نے کہا ہے کہ ایسے غلام کا امان دینا جس کو تصرف سے روک دیا گیا ہے امام اعظم ابو حنیفہ رحمہ اللہ کے پاس درست نہیں مگر یہ کہ اس کے مالک نے اس کو جنگ میں (شرکت) کی اجازت ہو۔ اور امام محمد رحمہ اللہ کہتے ہیں کہ درست ہے یہی قول امام شافعی رحمہ اللہ کا، امام مالک، امام احمد اور ایک روایت میں امام ابو یوسف رحمہم اللہ بھی یہی کہتے ہیں۔ امام اعظم ابو حنیفہ رحمہ اللہ کی دلیل اور امام مالک کی دلیل سحنون کی روایت جوان سے مذکور ہے ابن ہمام کی شرح میں تفصیل سے موجود ہے آپ نے کہا: اور اگر ایسے بچے نے امان دی ہو جو اسلام کو نہ تو سمجھتا ہو اور نہ اس کو بیان کر سکتا ہو، تو ائمہ اربعہ کا اتفاق ہے کہ یہ امان دینا درست نہیں۔ جس طرح مجنون کا امان دینا درست نہیں۔ اور اگر وہ عقل والا ہے لیکن جنگ سے روک دیا گیا تو اس میں اختلاف ہے۔ امام اعظم ابو حنیفہ رحمہ اللہ کے پاس درست نہیں ہے اور امام محمد رحمہ اللہ کے پاس درست ہے۔ اور امام ابو حنیفہ رحمہ اللہ کے قول کے مطابق امام شافعی رحمہ اللہ نے فرمایا ہے اور امام احمد نے بھی ایک روایت میں یہی فرمایا ہے کیونکہ بعینہ اس کا طلاق دینا، غلام کو آزاد کرنا غیر معتبر ہے ویسا ہی اس کا کہنا (یعنی امان دینا) بھی غیر معتبر ہے اور امام محمد رحمہ اللہ کے قول کے مطابق امام مالک اور امام احمد رحمہما اللہ نے فرمایا ہے اور اگر اس کو جنگ میں شرکت کی اجازت ہے تو ہمارے تمام ائمہ کے پاس بالاتفاق جائز ہے اور یہ قول امام مالک اور امام احمد رحمہما اللہ کا ہے۔ اور امان دینے کی تفصیلات کتاب القصاص میں سیدنا علی رضی اللہ تعالیٰ عنہ سے مروی حدیث شریف ”يسعى بذمتهم أدناهم“ (مسلمانوں کی دی ہوئی ذمہ داری کو ان میں کا ادنیٰ آدمی بھی پورا کرے گا) کے ضمن میں مذکور ہے آپ اس کا مطالعہ کریں۔ یہ اس باب کی نفیس بحث ہے۔ 5 قولہ: اوفوا بحلف الجاهلية (جاہلیت کے معاہدوں کو پورا کرو) الخ اس سے مراد وہ معاہدے ہیں جو اسلام کے موافق ہوں، مخالف نہیں اور اس کے لئے حضور علیہ والصلٰوة والسلام کا ارشاد ”فانه لا يزيده الا شدة“ (اسلام اس کی مضبوطی کو اور زیادہ کر دیتا ہے) دلیل ہے۔ اور جس کی نفی کی گئی ہے وہ وہ معاہدے ہیں جو اصول اسلام کے خلاف ہیں۔ یا یہ کہ آپ ﷺ کے ارشاد ”لا تحدثوا“ (نئے معاہدے مت کرو) میں جو ممانعت ہے اس نفی میں ہے کہ ان (نئے معاہدوں) کی ضرورت نہیں ہے کیونکہ اسلام بغیر کسی معاہدے کے بھی مسلمانوں کے درمیان ایک دوسرے کی مدد کو واجب قرار دیتا ہے۔ (کوکب دری) اور کتاب نہایہ میں ہے کہ حلف دراصل ایک دوسرے کی مدد اور تعاون کا معاہدہ ہے۔ اور حضور صلی اللہ علیہ وسلم نے اپنے ارشاد ”لا حلف فى الاسلام“ (اسلام میں معاہدے نہیں ہیں) کے ذریعہ جاہلیت کے ان معاہدوں سے منع فرمایا ہے جو (قتال کے درمیان) فتنوں اور جنگ و جدال کرنے کے لئے کئے جاتے تھے اور جاہلیت کے وہ معاہدے جو مظلوم کی مدد اور صلہ رحمی وغیرہ جیسے ہوتے تھے تو ان کے بارے میں حضور صلی اللہ علیہ وسلم کا یہ ارشاد ہے ”جاہلیت میں جو کوئی معاہدہ تھا اسلام اس کی مضبوطی کو اور زیادہ کر دیتا ہے“۔ (مرقات) 6 قولہ: وفاء لا غدر (ایفاء عہد کرنا، دھوکا نہیں دینا) عمرو بن عبسہ رضی اللہ عنہ نے اس کو ناپسند کیا تو اس کی وجہ یہ تھی کہ جب ان سے ایک مدت کے لئے آدمی اپنے مقام میں صلح کرلے تو اس مقررہ مدت کے دوران دشمن کی طرف جانا بھی اس مدت کے ختم میں شمار کیا جائے گا جس میں جنگ نہ کرنے کی شرط ہے۔ پس اس صلح کی مدت میں جب ان کی طرف پیش قدمی کرے گا تو جس مدت کے لئے انہوں نے تحفظ کی ہے اس سے پہلے جنگ کرنا متصور ہوگا اس لئے عمرو رضی اللہ نے دھوکا شمار کیا۔ لیکن صلح کرنے والے اگر صلح کو توڑ دیں اس طرح کہ ان سے خیانت ظاہر ہوتی تو سلطان کو ان کی غفلت کے موقعہ پر ان کی طرف پیش قدمی کرنے کا حق حاصل ہے۔ 7قولہ: اني لا اخيس بالعهد (میں عہد شکنی نہیں کرتا) اس میں یہ بات ہے کہ کافروں کے ساتھ بھی عہد کی پاسداری ایسا ہی کی جائے گی جیسے مسلمانوں کے ساتھ کی جاتی ہے۔ (مرقات) 8قولہ: لو لا ان الرسل لا تقتل لضربت اعناقكما (سنو! خدا کی قسم اگر یہ بات نہ ہوتی کہ قاصدوں کو قتل نہیں کیا جاتا تو میں تم دونوں کی گردن مار دیتا) شوکانی نے کہا ہے کہ دونوں حدیثیں دلالت کرتی ہیں اس بات پر کہ کفار کی جانب سے آنے والے سفیروں کو بھی قتل کرنا حرام ہے اگرچہ حاکم کے سامنے اور مسلمانوں کے سامنے وہ کفر کی بات بولیں کیونکہ سفارت کا تقاضہ ہے کہ وہ جواب دیا جائے جو سفیر کے ذریعہ پہنچے تو گویا یہ بھی معاہدہ کے درجہ میں ہے۔ (بذل المجہود) 1قولہ: يَأَيُّهَا النَّبِيُّ حَرِّضِ الْمُؤْمِنِينَ عَلَى الْقِتَالِ۔ (اے نبی آپ مومنین کو جنگ پر ابھارئیے) تفسیرات احمدیہ میں ہے اس آیت میں مومنین کو جنگ کے لئے ابھارنے کا ذکر ہے مراد اس سے ان کو ترغیب دینے میں مبالغہ کیجئے اور صاحب ہدایہ کے اس قول میں اس کی طرف اشارہ ہے: ان التنفيل من جملة التحريض المندوب اليه (مجاہدین کے لئے کسی زائد انعام کا مقرر کرنا اسی تحریض کے قبیل سے ہے جو مستحب ہے۔ 2قولہ: فجاءت النار فاكلتها الخ (آگ آئی اور اس نے اس کو کھالیا) اگر تم یہ کہو کہ ان کے اموال غنیمت کو آگ کے کھا جانے میں اور ان کا ہمارے لئے حلال ہونے میں کیا حکمت ہے، میں کہتا ہوں ان کے حق میں یہ حکم اس لئے مقرر کیا گیا تا کہ ان کی جنگ اخلاص کی وجہ سے مال غنیمت کے خاطر نہ ہو۔ اور لیکن ان اموال غنیمت کا اس امت کے حق میں حلال کیا جانا ان میں اخلاص کے غالب ہونے کی وجہ سے ہے پس کسی اور سبب کی ضرورت نہیں۔ (عمدۃ القاری) 3قوله: فذكر الغلول الخ (پس آپ صلی اللہ علیہ وسلم نے خیانت کا ذکر کیا) امام نووی نے خیانت کا گناہ کبیرہ میں سے ہونے پر اجماع نقل کیا۔ (عمدۃ القاری) 4 قوله: لا يدخل الجنة الا المؤمنون الخ (جنت میں سوائے اہل ایمان کے کوئی داخل نہیں ہوگا) ابن ملک نے کہا کہ مومن سے مراد عارف میں شخص ہے جو حضرت محمد مصطفیٰ صلی اللہ علیہ وسلم پر اور آپ ﷺ جو بھی لائے ہیں اس پر ایمان لائے اور جو آدمی خیانت کرتا ہے تو گویا وہ اس کی تصدیق نہیں کرتا کیونکہ وہ اپنی تصدیق کے حکم پر نہیں چلا اور نبی اکرم صلی اللہ علیہ وسلم مسلمانوں کو اس طرح کے عمل سے روکنے کے لئے اس کو مسلمانوں میں شامل نہیں فرماتے ہیں۔ (مرقات) 5قولہ: وقال الامام الطحاوي (اور امام طحاوی نے کہا) الخ مال غنیمت کی چوری کرنے والے کی سزا کے بارے میں علماء کا اختلاف ہوا ہے۔ جمہور کا کہنا ہے کہ اس کی حالت کے مطابق امام تعزیر کرے گا مگر اس کا سامان نہیں جلائے گا۔ یہ قول امام ابوحنیفہ، امام شافعی، امام مالک اور صحابہ و تابعین اور ان کے بعد کے حضرات کی بڑی جماعت کا ہے اور انہوں نے اس حدیث شریف کو زجر اور وعید پر محمول کیا ہے، واجب قرار نہیں دیا۔ اور امام بخاری نے کہا ہے کہ نبی اکرم صلی اللہ علیہ وسلم سے مال غنیمت کے چور کے بارے میں ایک سے زائد احادیث میں آیا ہے اور آپ ﷺ نے اس کے سامان کو جلانے کا حکم نہیں فرمایا۔ حضرت حسن، امام احمد و اسحق و مکحول اور امام اوزاعی نے کہا اس کا کجاوہ اور اس کا سارا سامان جلا دیا جائے گا۔ البتہ امام اوزاعی کے پاس سوائے اس کے ہتھیار اور ان کپڑوں کے جو اس پر ہیں۔ حضرت حسن نے کہا سوائے جانور اور قرآن مجید کے۔ اور انہوں نے کہا ابن عمر کی وہ حدیث شریف جو عمرو سے مرفوعا ہے مال غنیمت کے چور کے کجاوہ کو جلانے سے متعلق تو اس حدیث میں صالح بن محمد، سالم سے روایت کرنے میں متفرد ہیں اور وہ ضعیف ہیں۔ اور اس لئے بھی کہ نبی اکرم صلی اللہ علیہ وسلم نے اس آدمی کے کجاوہ کو جلانے کا حکم نہیں فرمایا۔ جس کے پاس منکے اور عباء پایا گیا تھا۔ (ماخوذ از عمدۃ القاری و مرقات) 6قولہ : جاء رجل بشراك او شراكين الخ (ایک آدمی ایک تسمہ یا دو تسمے لے کر آیا) علماء کا اس بات پر اتفاق ہوا ہے کہ مال غنیمت میں چوری کرنے والے پر ضروری ہے کہ لوگوں کے الگ الگ ہو جانے سے پہلے وہ جس چیز کی چوری کیا ہے اس کو تقسیم کرنے والے کے پاس واپس کر دے۔ اور جب لوگ الگ الگ ہو جائیں تو اس وقت واپس کئے جانے والے مال کے بارے میں ان کا اختلاف ہے۔ ایک جماعت کا کہنا ہے کہ اس میں پانچواں حصہ امام (حاکم) کو دیدے اور باقی کا صدقہ کر دے یہ قول امام حسن بصری، مالک، اوزاعی، لیث، زہری اور ثوری اور امام احمد رحمہم اللہ کا ہے اور یہ ابن مسعود، ابن عباس اور معاویہ رضی اللہ تعالیٰ عنہم سے مروی ہے۔ اور امام شافعی رحمہ اللہ کی رائے یہ نہیں تھی۔ اور فرماتے تھے اگر وہ اس کی ملک ہے تو اس پر اس کا صدقہ کرنا ضروری نہیں ہے۔ اور اگر وہ اس کا مالک نہیں ہے تو دوسرے کے مال کا صدقہ کرنا اس کے لئے جائز نہیں ہے۔ اور انہوں نے کہا اس پر واجب یہ ہے کہ وہ (اس مال کو) امام (حاکم) کے حوالہ کر دے جیسے گمشدہ اموال کا حکم ہے۔ لیکن اس بارے میں علماء احناف کا قول وہ ہے جس کو صاحب سیر کبیر نے بیان کیا ہے: اور اگر کوئی شخص اموال غنیمت میں سے کوئی چیز چوری کر کے پھر وہ شرمندہ ہوا اور تقسیم کے بعد حاکم کے پاس لے کر آئے اور فوج الگ الگ ہو چکی ہو تو اس میں حاکم کو اختیار ہے اور وہ چاہے تو اس کو جو کچھ اس نے کہا ہے جھوٹا قرار دے اور کہے کہ مجھے تیری سچائی معلوم نہیں اور تو اپنے قول کے مطابق وبال کو لازم کر لیا ہے تو جو اپنے ذمہ لازم کر لیا ہے اس کو تو جانتا، نہ تو اس کے کسی حق پہونچانے اور اگر وہ (حاکم) چاہے تو اس سے اس چیز کو لے لے اور اس کا خمس ان لوگوں کے لئے رکھ دے جن کو اللہ نے مقرر کیا ہے کیونکہ مال اس کے ہاتھ میں پایا گیا ہے۔ اور صاحب مال اس کے قبضہ میں جو کچھ ہے اس کے بارے میں جو بھی خبر دے گا شرعاً اس کی تصدیق کی جائے گی اور اس کی صداقت کے مطابق اس میں کا پانچواں حصہ خمس والوں کے لئے ہوگا اور وہ ان کو دیا جائے اور باقی مال لقطہ (وہ چیز جو تم کو راستہ میں پڑی ہوئی ملے) کے درجہ میں رہے گا اگر اس کو توقع ہے کہ اس کے مستحق مل جائیں گے تو اس میں وہی حکم ہے جس کا ہم نے ذکر کیا ہے اور اگر اس کی امید نہیں ہے اگر وہ چاہے تو مساکین کے درمیان اس کو تقسیم کر دے ورنہ اس کو بیت المال میں وقف کر دے اور اس پر اس کا معاملہ اور اس کے تمام احوال درج کر دے اور اگر چوری کرنے والا اس مال کو حاکم کے پاس لے کر نہیں آیا مگر اس نے چوری سے توبہ کر لی اور وہ مال اس کے پاس موجود ہے اور اس کو اس کے مستحق کے مل جانے کی توقع نہیں ہے تو اس کے لئے مستحب ہے کہ وہ اس کا صدقہ کر دے اور اگر اس کو اس کی امید ہے تو اس میں لقطہ کا حکم ہوگا بیان تمام امور میں جس کا ہم ذکر کر چکے ہیں، اس کو حاکم کے پاس پیش کر دینا مجھے زیادہ پسند ہے جیسا کہ لقطہ میں بھی ہے۔ اس (شخص) کے اس (مال) کو حاکم کے پاس پیش کرنے کے بعد حاکم کو اس کے صدقہ کرنے سے متعلق اختیار رہے گا مگر اس کے لئے مناسب ہے کہ خمس کو اس کے ہاتھ میں نہ چھوڑے کیونکہ اس نے اس بات کا اقرار کر لیا ہے اس کے ہاتھ میں جو کچھ ہے اس کا خمس ان لوگوں کے لئے ہے جن کا اللہ تعالیٰ نے اپنی کتاب میں تعیین فرمایا ہے، جس اس کے ہاتھ میں جو چیز ہے اس میں اس کا اقرار اس کے حق میں درست ہے۔ پس اس کے لئے چاہئے کہ اس میں سے خمس لے لے اور اس کے مستحق مصارف میں اس کو خرچ کر لے تاکہ اصحاب خمس کے حقوق ضائع نہ ہو۔ 7قولہ: فلن اقبله عنك (میں اس کو تیری طرف سے ہرگز قبول نہیں کروں گا) اس کی وجہ یہ ہے کہ اس کے قول پر چوری کا یقین نہیں ہوا امام محمد رحمہ اللہ نے سیر کبیر میں یہی وجہ بتائی ہے۔