Hadith 5130

شیخ تورپشتی رحمۃ اللہ علیہ نے کہا: یہ حدیث شریف کو اور جو اس کے ہم معنی روایات آئی ہیں انکو اس بات پر محمول نہیں کیا جا سکتا کہ حضور صلی اللہ علیہ وسلم کو اپنے انجام کار کے بارے میں کوئی تردد رہا ہو، اللہ تعالیٰ کے پاس آپ کے بہتر و عمدہ مقامات سے متعلق غیر یقینی کیفیت میں رہے ہوں؛ کیونکہ حضور اکرم صلی اللہ علیہ وسلم سے ایسی صحیح احادیث آئی ہیں جن کے پیش نظر اس کے خلاف جو عندیہ ہے ختم ہوجاتا ہے اور اس پر اسکو کیسے محمول کیا جا سکتا ہے؟ جبکہ حضور ﷺ ہی اللہ تعالیٰ کی طرف سے یہ خبر دینے والے ہیں کہ اللہ تعالیٰ آپ کو مقام محمود پر فائز فرمائے گا اور آپ اللہ تعالیٰ کی تمام مخلوق میں سب سے زیادہ بزرگ و برتر ہیں اور آپ ہی سب سے پہلے شفاعت فرمائیں گے اور آپ ہی کی شفاعت سب سے پہلے قبول کی جائے گی اور دیگر بشارتیں وغیرہ۔ اور علامہ طیبی رحمة اللہ علیہ نے کہا: اس میں کئی توجیہات ہیں جس میں سے ایک یہ ہے کہ یہ منسوخ ہے، اللہ تعالیٰ کے ارشاد سے ”لِيَغْفِرَ لَكَ اللّٰهُ مَا تَقَدَّمَ مِنْ ذَنْبِكَ وَمَا تَأَخَّرَ“ (48، سورۃ الفتح، آیت نمبر:2)(تا کہ اللہ تعالیٰ آپ کی خاطر آپ کو پہلے اور بعد میں معصوم رکھے) جیسا کہ سیدنا ابن عباس رضی اللہ تعالیٰ عنہ نے اللہ تعالیٰ کے اس ارشاد: ”وَمَا أَدْرِي مَا يُفْعَلُ بِي وَلَا بِكُمْ“ (46، سورۃ الاحقاف، آیت نمبر:9) کی تفسیر میں فرمایا ہے۔