Hadith 2464

یہ حدیث سند کے اعتبار سے صحیح ہے۔ ”ابوسفیان“ کا نام ”طلحہ بن نافع“ ہے۔ اس سے امام مسلم و دیگر محدثین نے استدلال فرمایا ہے۔ (مرقات)۔ حضرت امام محی السنہ رحمۃ اللہ علیہ نے فرمایا: جن حضرات نے (بحالت روزہ) پچھنا لگانے کی اجازت دی ہے ان میں بعض نے روزہ ٹوٹنے کی وجہ یہ بتلائی کہ (محجوم) جس کو پچھنا لگایا جا رہا ہے (خون نکلنے کی وجہ سے اس کو) کمزوری لاحق ہوگی (اور روزہ توڑنے کی نوبت آئے گی) اور (حاجم) پچھنا لگانے والا جب وہ خون چوسے گا تو وہ اس سے محفوظ نہیں رہتا کہ خون کا کچھ حصہ اس کے پیٹ تک پہنچ جائے۔ ف: واضح ہو کہ پچھنے لگوانا یا سینگی کھینچنا یہ ہے کہ جسم میں خون زیادہ ہوجائے تو شریانوں کے ذریعہ اس کو خارج کروا دیا جائے۔ مرقات میں لکھا ہے کہ پچھنے لگوانے میں یہ احتیاط ضروری ہے کہ پچھنے لگوانے والے کا اتنا خون نہ نکال دیا جائے کہ کمزوری کی وجہ سے اس کو روزہ توڑنے کی نوبت آئے اور پچھنوں سے خون چوسنے والا احتیاط کرے کہیں خون اس کے پیٹ میں نہ چلا جائے کہ جس سے اس کا روزہ ٹوٹ جائے۔12