Hadith 2570

ام المؤمنین حضرت عائشہ صدیقہ رضی اللہ عنہا سے روایت ہے کہ وہ فرماتی ہے کہ:۔ رسول اللہ صلی اللہ علیہ وسلم نے ارشاد فرمایا ہے کہ قرآن کا ماہر (جو قرآن کے حفظ و تجوید میں مہارت رکھتا ہو اور قرآن کے احکام کا عالم ہو اور ان پر پوری طرح عمل کرنے والا ہو تو اس کا حشر) ان مقرب اور معزز فرشتوں کے ساتھ ہوگا جو لوح محفوظ سے کتب الٰہیہ کو لکھتے ہیں اور وہ شخص جو قرآن کو (عدم مہارت کی وجہ سے دشواری کے ساتھ) دوہرا دوہرا کر رک رک کر پڑھتا ہے تو اس کو دو اجر ملتے ہیں۔ (قرآن کی تلاوت کا بھی اجر اور پڑھنے کی مشقت کا بھی اجر اس فضیلت سے مشقت سے قرآن پڑھنے والے کی دلجوئی مقصود ہے تاکہ وہ قرآن کے سیکھنے میں کم ہمت نہ ہو۔ یوں تو ماہر بالقرآن کی فضیلت ظاہر ہے کہ اس کا حشر ملائکہ مقربین انبیاء اور مرسلین اور صحابہ کرام کے ساتھ ہوگا)۔ اس حدیث کی روایت بخاری اور مسلم نے متفقہ طور پر کی ہے۔