Hadith 1135

ف (1) واضح ہو کہ نماز میں بعض چیزیں فرض ہیں اور بعض واجب ہیں، فرض اور واجب کے درمیان فرق یہ ہے کہ جو چیزیں فرض ہیں اگر وہ عمداً ترک ہو جائیں یا سہواً دونوں صورتوں میں نماز باطل ہو جاتی ہے اور کسی طرح درست نہیں ہو سکتی، تاوقتیکہ اس کا اعادہ نہ کیا جائے اس لئے کہ فرائض ادا کئے بغیر نماز جائز ہی نہیں ہوتی۔ اس کے برخلاف نماز میں واجبات ترک ہو جائیں تو نماز باطل نہیں ہوتی ہے بلکہ ناقص ہوتی ہے، واجب اگر سہواً ترک ہوا ہے تو سجدہ سہو کرنے سے نماز ادا ہو جاتی ہے اور اگر واجب عمداً ترک ہوا ہو تو نماز کا لوٹانا ضروری ہے۔ فرض اور واجب کے اس فرق کو پیش نظر رکھ کر مذکورہ بالا دو حدیثوں پر غور کیجئے۔ مذکورہ بالا دو حدیثیں اور اسی طرح دوسری حدیثیں جو آگے آ رہی ہیں اس بات کی دلیل ہیں کہ نماز میں سورہ فاتحہ کا پڑھنا فرض نہیں ہے اس لئے کہ حدیث شریف میں خداج کا لفظ آیا ہے جس کے معنی ناقص کے ہیں اگر سورہ فاتحہ کا پڑھنا نماز میں فرض ہوتا تو حضور صلی اللہ علیہ وسلم اس نماز کو جس میں سورہ فاتحہ نہ پڑھی گئی ہو ”فَهِيَ بَاطِلَةٌ“ (وہ نماز باطل ہے) فرماتے :”فَهِيَ خِدَاجٌ“ (وہ نماز ناقص ہے) نہ فرماتے، چونکہ حضور صلی اللہ علیہ وسلم نے یہاں ”فَهِيَ خِدَاجٌ“ فرمایا ہے اس لئے نماز ناقص ہوگی باطل نہیں ہوگی۔ اس طرح حدیث شریف کے لفظ ”خِدَاجٌ“ سے ثابت ہو گیا کہ نماز میں سورہ فاتحہ کا پڑھنا واجب ہے فرض نہیں ہے۔ (یہ مضمون سعایہ رد المحتار اور المنتقی کے بین السطور سے ماخوذ ہے۔) ف(2): مذکورہ حدیثوں کے پیش نظر احناف کے پاس نماز میں سورہ فاتحہ کا پڑھنا فرض نہیں بلکہ واجب ہے اس سے بعض حضرات کو یہ غلط فہمی پیدا ہوگئی ہے کہ احناف کے پاس سورہ فاتحہ پڑھے بغیر بھی نماز جائز ہو جاتی ہے حالانکہ یہ صحیح نہیں ہے، اس لئے کہ احناف نے کبھی بھی یہ نہیں کہا کہ سورہ فاتحہ کے بغیر بھی نماز جائز ہو جاتی ہے۔ حنفیوں کی فراست کا کیا کہنا کہ انہوں نے تو وہی کہا ہے جو حدیث شریف کا منشاء ہے، حدیث شریف میں ”خداج“ کا جو لفظ آیا ہے اس کے معنی ناقص کے ہیں اس لئے جس نماز میں سورہ فاتحہ نہ پڑھی جائے تو وہ ناقص ہے اور نماز کے اس نقص کو دور کرنے کے لئے سہواً سورہ فاتحہ ترک ہو جائے تو سجدہ سہو کیا جائے گا اور عمداً سورہ فاتحہ ترک کی گئی ہے تو نماز کا اعادہ ضروری ہوگا اور یہی حنفی مذہب ہے۔ البتہ جو حضرات حدیث کے لفظ ”خداج“ سے نماز میں سورہ فاتحہ نہ پڑھنے کی صورت میں نماز کے باطل ہونے کا حکم لگاتے ہیں وہ حدیث کے منشاء کے خلاف کر رہے ہیں اس لئے کہ ناقص چیز کو معدوم نہیں کہا جا سکتا کیوں کہ ناقص اور معدوم میں بڑا فرق ہے معدوم تو باطل کو کہتے ہیں جس کا وجود ہی نہ ہوا اور ناقص ایسی چیز کو کہتے ہیں کہ جو نقص کے ساتھ موجود ہے اور حدیث سے بھی واضح ہوتا ہے کہ نمازی کے سورہ فاتحہ نہ پڑھنے سے نماز ناقص ہو جاتی ہے یعنی نماز ادا تو ہو جاتی ہے مگر ناقص رہتی ہے اور اس نقص کا سجدہ سہو سے یا اعادہ سے دور کیا جانا ضروری ہے، اس کے باوجود بھی حنفیوں پر یہ اعتراض کہ یہ سورہ فاتحہ کے بغیر نماز کے درست ہونے کے قائل ہیں کیسے صحیح ہو سکتا ہے۔ (یہ مضمون اوجز المسالک سے ماخوذ ہے۔)