Hadith 1514

ابوہریرہ رضی اللہ عنہ سے روایت ہے وہ فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا کہ افعال نماز میں امام سے سبقت نہ کرو (بلکہ امام کے ہر فعل کے بعد ہی تم بھی اسی فعل کو امام کے فعل سے ملا ہوا ادا کرو) جب امام اللہ اکبر کہے تو تم بھی اللہ اکبر (اس طرح) کہو (کہ امام کے اللہ اکبر کی راء سے مقتدی کے اللہ اکبر کا الف ملا رہے، بخلاف اس کے اگر مقتدی امام کی تکبیر تحریمہ سے پہلے خود تکبیر تحریمہ کہہ لے تو مقتدی کی نماز ہی نہ ہوگی) (اور جب امام سورۃ فاتحہ پڑھتا ہے تو مقتدی سنتا رہے) اور جب امام ”وَلَا الضَّالِّينَ“ پڑھ کر (آمین کہنے کا ارادہ کرے تو) تم مقتدی بھی (امام کی طرح آہستہ سے) آمین کہو، اور جس وقت امام رکوع کرے تو تم بھی امام کے رکوع کے بعد اس کے رکوع سے متصل رکوع کرو، پھر جب امام رکوع سے سر اٹھاتے ہوئے ”سَمِعَ اللَّهُ لِمَنْ حَمِدَهُ“ کہے (تو امام کو چاہئے کہ ”رَبَّنَا لَكَ الْحَمْدُ“ نہ کہے) مقتدی کو چاہئے کہ (جب وہ رکوع سے سر اٹھائے تو ”سَمِعَ اللّٰهُ لِمَنْ حَمِدَهٗ“ نہ کہے صرف) ”اللّٰهُمَّ رَبَّنَا لَكَ الْحَمْدُ“ کہے۔ (اس کی روایت بخاری اور مسلم نے متفقہ طور پر کی ہے۔)