Hadith 1714

ام المومنین حضرت عائشہ رضی اللہ عنہا سے روایت ہے آپ فرماتی ہیں: رسول اللہ صلی اللہ علیہ وآلہ وسلم نے ارشاد فرمایا: عائشہ! تم کچھ جانتی ہو کہ آج پندرھویں شعبان کی رات (جو شب براءت ہے) کیا ہو رہا ہے؟ ام المومنین عرض کیں: اللہ اور اس کے رسول خوب جانتے ہیں فرمائیے یا رسول اللہﷺ آج کی رات کیا ہو رہا ہے؟ حضور صلی اللہ علیہ وآلہ وسلم نے ارشاد فرمایا: (قیامت تک جو جو ہونا ہے وہ تو سب لوح محفوظ میں لکھا گیا ہے لیکن اس سال جو ہونا ہے وہ آج کی رات لوح محفوظ سے نقل کیا جا رہا ہے ان میں سے ایک یہ ہے کہ) اس سال بنی آدم جو پیدا ہونے والے ہیں وہ سب لکھے جا رہے ہیں اور اس سال جو بنی آدم مرنے والے ہیں ان کے بھی نام لکھے جا رہے ہیں (روزانہ کے نیک اعمالوں کو جیسے آسمان پر اٹھا لیا جاتا ہے ایسے ہی وہ اعمال صالحہ جو ابھی نہیں ہوئے ہیں اور اس سال ہونے والے ہیں) ان کو بھی آج کی رات لکھ لیا جاتا ہے اور لوح محفوظ سے مقابلہ کے لئے آسمانوں پر اٹھا لیا جاتا ہے) اور اس رات بنی آدم کے سال بھر کا رزق اتارا جاتا ہے (کہ کس کو کیا ملے گا اور کس قدر ملے گا)(ام المؤمنین حضرت عائشہ رضی اللہ عنہا جب سنیں کہ سال بھر ہونے والے اعمال صالحہ جو ابھی واقع نہیں ہوئے ہیں لکھ کر آسمانوں پر اٹھا لئے جاتے ہیں تو) ام المؤمنین (کو شبہ ہوا اس لئے) دریافت فرمائیں کہ یا رسول اللہ (اعمال صالحہ جو دخول جنت کے موجب ہیں اپنے وقوع سے پہلے ہی لکھ لئے جاتے ہیں اور آسمانوں پر اٹھا لئے جاتے ہیں تو معلوم ہوا کہ جنت اعمال صالحہ کے بدلہ میں نہیں بلکہ جس کو اللہ کی رحمت شامل ہو جائے وہی جنت میں جائے گا؟ یہ سن کر رسول صلی اللہ علیہ وآلہ وسلم نے فرمایا: یا عائشہ! (اعمال صالحہ جنت میں جانے کے لئے ظاہری سبب ہیں مگر حقیقی سبب اللہ تعالیٰ کی رحمت ہے کہ جس کو جنت میں داخل کرنا چاہتے ہیں اس کو اعمال صالحہ کی توفیق عطا فرماتے ہیں اس لئے) رحمت الٰہی ہی جنت میں جانے کا سبب حقیقی ہے، تین بار اس طرح ارشاد ہوا۔ یہ سن کر میں عرض کی: یا رسول اللہ! (آپ علم و عمل میں کمال رکھتے ہیں کہ کوئی آپ کا ثانی نہیں) کیا آپ بھی بجز رحمت الٰہی کے جنت میں نہیں جائیں گے؟ تو حضور اپنے سر مبارک پر ہاتھ رکھ کر (اپنی احتیاج کو ظاہر کر کے) فرمائے کہ میں بھی نہیں جاؤں گا مگر یہ کہ رحمت الٰہی مجھے گھیر لے تو میں بھی جنت میں جاؤں گا، اس کو بھی آپ تین مرتبہ فرمائے (چونکہ اللہ تعالیٰ نے مجھ کو عالمین کے لئے رحمت بنا کر بھیجا ہے اور ہمیشہ مجھ کو رحمت الٰہی گھیرے رہتی ہے، اسی لئے میں اعمال صالحہ میں بیحد کوشش کرتا ہوں کہ اعمال ظاہری جو رحمت الٰہی کے سبب ہیں جنت میں لے جانے کے باعث بنیں)۔ (اس حدیث کی روایت بیہقی نے دعوات کبیر میں کی ہے۔)