Chapter on Night Prayers in Ramadan

فصل دوّم میں یہ مذکور ہے کہ پورے رمضان المبارک میں تراویح کا جماعت کے ساتھ اداء کرنا سنت مؤکدہ ہے اس لئے کہ رسول اللہ صلی اللہ علیہ وآلہ وسلم رمضان کی چند راتوں میں تراویح کو جماعت کے ساتھ اداء فرمائے ہیں۔ تراویح کو ہمیشہ باجماعت پڑھنے سے حضور صلی اللہ صلی اللہ علیہ وآلہ وسلم کو تراویح کے فرض ہونے کا خوف نہ ہوتا تو آپ پورا مہینہ جماعت کے ساتھ تراویح پڑھاتے۔ چونکہ حضور صلی اللہ علیہ وآلہ وسلم نے امت پر فرض ہونے کے خوف سے تراویح باجماعت پر مواظبت نہیں فرمائی ہے۔ اس لئے سمجھا جائے گا حضور کا چند روز تراویح کو باجماعت اداء کرنا تراویح پر مواظبت فرمانے یعنی تراویح کو ہمیشہ اداء کرنے کے حکم میں ہے۔ اس طرح ثابت ہوا کہ تراویح کو رمضان بھر جماعت کے ساتھ اداء کرنا سنت مؤکدہ ہے۔ حضور صلی اللہ علیہ وآلہ وسلم کے بعد صحابہ کے ہمیشہ تراویح جماعت کے ساتھ پڑھنے سے تراویح باجماعت کے امت پر فرض ہونے کا خوف باقی نہ رہا۔ اس لئے خلفائے راشدین رضی اللہ عنہم میں سے حضرت عمر فاروقؓ نے پورے رمضان میں تراویح کو جماعت کے ساتھ پڑھنے کا حکم دیا بلکہ سب کو ایک امام کے پیچھے رمضان بھر باجماعت تراویح پڑھنے کا پابند فرما دیا۔ اس وقت صحابہ کرام کی پوری جماعت نے آپ کے فعل پر اعتراض نہیں کیا اور آپ کے بعد حضرت عثمان غنیؓ اور حضرت علی مرتضیٰؓ کے دور میں بھی باجماعت تراویح پر عمل درآمد ہوتا رہا بلکہ آج تک پوری امت مسلمہ دنیا کے ہر شہر اور ملک میں تراویح باجماعت پڑھتی آ رہی ہے اس طرح خلفائے راشدین کا تراویح باجماعت کو پسند فرمانا اور اس کو باجماعت پڑھنے کا حکم دینے سے معلوم ہوا کہ پورے رمضان میں تراویح باجماعت ان حضرات کے پاس بھی سنت مؤکدہ تھی۔ اس کی تائید میں ذیل کی حدیثیں آ رہی ہیں۔

ف: اس حدیث کو اور اس کے پہلے کی حدیث کو غور سے پڑھئے تو معلوم ہوتا ہے کہ تراویح کی بناء اس طرح پڑھی کہ کچھ راتیں حضور صلی اللہ علیہ وآلہ وسلم بنفس نفیس تراویح پڑھائے ہیں اور ایک مصلحت سے یعنی امت پر فرض ہو جانے کے خوف سے آپ نے اس پر مداومت نہیں فرمائی۔ پھر حضور صلی اللہ علیہ وآلہ وسلم کے زمانہ ہی میں صحابہ کرام تراویح کو جماعت کے ساتھ پڑھنا شروع کر دئے تھے۔ حضور نے بھی ان کی تراویح باجماعت کو پسند فرما کر ان کی تعریف فرمائی مگر حضور کے زمانہ مبارک میں تراویح کا عام رواج نہیں ہوا تھا حضرت عمر رضی اللہ عنہ نے اپنے زمانہ میں اسی مذکور الصدر واقعہ کو اصل بنا کر تراویح باجماعت کا عام طور پر حکم دے دیا اور حضرت ابی جو حضور کے عہد مبارک میں امام بن کر تراویح پڑھاتے تھے ان ہی کو امام بنائے تاکہ حضور کے زمانہ کی تراویح کی پوری پوری اتباع ہو۔ (تعلیق ممجد میں ایسا ہی لکھا ہے۔)

ف: اس حدیث شریف سے معلوم ہوا کہ تراویح جس کا عہد نبوت میں عام رواج نہ تھا صحابہ کرام اپنے زمانہ میں اس کو پسند فرما کر عام رواج دے رہے تھے، اسی لئے پورے رمضان میں تراویح کو باجماعت قائم کرنا سنت مؤکدہ ہے اور اللہ تعالیٰ کے پاس بھی پسندیدہ ہے۔ اب رہی یہ بات کہ حدیث شریف کے لفظ ”مسلمون“ سے صحابہ کرام اور ائمہ مجتہدین مراد لئے گئے ہیں۔ اس کی وجہ یہ ہے کہ حدیث شریف میں لفظ ”مسلمون“ مطلقاً آیا ہے اور اس کو کسی قید سے مقید نہیں کیا گیا ہے اور یہ مسلمہ قاعدہ ہے کہ اگر مطلق سے فرد کامل کے سوا کوئی اور مراد ہونے کا قرینہ نہ ہو تو مطلق سے فرد کامل ہی مراد ہوتا ہے چونکہ صحابہ اور ائمہ مجتہدین میں صفت اسلام کامل ہے اسی لئے حدیث شریف کے لفظ ”مسلمون“ سے صحابہ کرام اور مجتہدین ہی مراد ہوں گے۔

اس حدیث سے معلوم ہوا کہ جیسے رسول اللہ صلی اللہ علیہ وآلہ وسلم کا طریقہ سنت ہے ایسا ہی خلفائے راشدین نے جو فرمایا یا عمل کیا ہو وہ بھی سنت ہے۔ مثال کے طور پر اس کی نظیر تراویح ہے۔ گو تراویح کی بناء عہد نبوت میں ہو چکی تھی، چند راتیں تو حضور علیہ الصلوۃ والسلام نے بنفس نفیس تراویح پڑھائی ہے اور صحابہ کرام رضی اللہ عنہم بھی تراویح پڑھنا شروع کر دئے تھے مگر تراویح کا عام رواج نہیں ہوا تھا لیکن حضرت عمر رضی اللہ عنہ کے زمانہ میں تراویح کا عام رواج ہو گیا اور سب صحابہ تراویح پڑھا کرتے تھے اس لئے تراویح بھی اور سنتوں کی طرح سنت مؤکدہ ہے)۔ رسول اللہ صلی اللہ علیہ وآلہ وسلم نے یہ بھی ارشاد فرمایا ہے کہ تم کو چاہئے کہ نئی باتوں سے بچتے رہو، کیونکہ ہر نئی بات (جو میرے اور میرے صحابہ کے دور میں نہیں ہوئی وہ) بدعت ہے اور ہر (ایسی) بدعت (جو سیئہ ہو وہ) گمراہی ہے۔ اس حدیث شریف میں ”كُلُّ بِدْعَةٍ ضَلَالَةٌ“ جو ارشاد ہوا ہے اس پر غور کرنا ضروری ہے اس لئے کہ اس سے یہ سمجھا جائے کہ ہر بدعت گمراہی ہے تو پھر مسلم نے جریرہ رضی اللہ عنہ سے جو روایت کی ہے اس کا کیا مطلب ہوگا؟ مسلم کی روایت یہ ہے: ”قَالَ رَسُولُ اللهِ صَلَّى اللهُ عَلَيْهِ وَآلِهِ وَسَلَّمَ : مَنْ سَنَّ فِى الْإِسْلَامِ سُنَّةً حَسَنَةً فَلَهُ أَجْرُهَا وَأَجْرُ مَنْ عَمِلَ بِهَا بَعْدَهُ مِنْ غَيْرِ أَنْ يَنْقُصَ مِنْ أُجُورِهِمْ شَىْءٌ . وَمَنْ سَنَّ فِى الْإِسْلَامِ سُنَّةً سَيِّئَةً كَانَ عَلَيْهِ وِزْرُهَا وَوِزْرُ مَنْ عَمِلَ بِهَا مِنْ بَعْدِهِ مِنْ غَيْرِ أَنْ يَنْقُصَ مِنْ أَوْزَارِهِمْ شَىْءٌ “ رسول اللہ صلی اللہ علیہ وآلہ وسلم نے ارشاد فرمایا: جو شخص کہ اسلام میں کوئی اچھا طریقہ ایجاد کرے تو اس شخص کو اس اچھے طریقہ کے ایجاد کرنے کا ثواب ملے گا اور اس شخص کو ان لوگوں کا بھی ثواب ملے گا جو اس کے ایجاد کئے ہوئے نیک طریقہ پر عمل کر رہے ہوں اور بغیر اس کے کہ اس شخص کے ایجاد کئے ہوئے طریقہ پر عمل کرنے والوں کے ثواب میں کسی قسم کی کمی نہیں ہوگی۔ اور جو شخص کہ اسلام میں کوئی برا طریقہ ایجاد کرے تو اس شخص کو اس برے طریقہ کے ایجاد کرنے کا گناہ ہوگا اور ان لوگوں کا گناہ بھی اس شخص کے سر رہے گا جنہوں نے اس کے بعد اس کے ایجاد کئے ہوئے طریقہ پر عمل کیا ہو، اور اس شخص کے ایجاد کئے ہوئے برے طریقہ پر عمل کرنے والوں کے گناہوں میں کسی قسم کی کمی نہیں ہوگی۔ مسلم کی اس حدیث سے معلوم ہوا کہ بدعت دو طرح پر ہے: ایک بدعت حسنہ، جس پر ثواب کی خوشخبری سنائی گئی ہے اور دوسرے بدعت سیئہ، جس پر عذاب کا خوف دلایا گیا ہے۔ اب یہاں یہ بات قابل غور ہے کہ صدر کی حدیث میں جو ”كُلُّ بِدْعَةٍ ضَلَالَةٌ“ (ہر بدعت گمراہی ہے) ارشاد ہے کیا اس سے مراد ہر بدعت، خواہ حسنہ ہو یا سیئہ ہو، گمراہی ہوگی حالانکہ مسلم کی مذکورہ حدیث سے تو صرف بدعت سیئہ ہی کے گمراہی ہونے کا ثبوت ملتا ہے نہ کہ بدعت حسنہ کے گمراہی ہونے کا۔ اسی وجہ سے علماء نے صراحت کی ہے کہ مسلم کی اس حدیث اور اس طرح کی اور احادیث کی بناء پر ”كُلُّ بِدْعَةٍ ضَلَالَةٌ“ (اپنے عموم پر باقی نہ رہی بلکہ اس سے خاص بدعت سیئہ ہی مراد ہوگی اور بدعت سیئہ ہی گمراہی ہوگی۔ یہاں اس حدیث کے عام کو خاص کرنا ایسا ہی ہے جیسے ”تُدَمِّرُ كُلَّ شَىْءٍ“ کی آیت میں ”كُلِّ شَيْءٍ“ کے عام سے خاص مراد لیا گیا ہے۔ اس کی تفصیل یہ ہے کہ حضرت ہود-علی نبینا و علیہ الصلاۃ والسلام - کی قوم پر نافرمانی کی وجہ سے ہوا کا عذاب نازل کیا گیا۔ اس عذاب کا ذکر سورۂ احقاف پ26 ع3 آیت نمبر:25 میں اس طرح مذکور ہے ”تُدَمِّرُ كُلَّ شَيْءٍ بِأَمْرِ رَبِّهَا“ یعنی وہ ہوا اپنے رب کے حکم سے ہر چیز کو ہلاک کررہی تھی حالانکہ ہوا صرف انسانوں اور ان کے مویشیوں ہی کو ہلاک کررہی تھی، جیسا کہ مفسرین نے اس کی صراحت کی ہے تو یہاں جیسے ”كُلِّ شَيْءٍ“ کے عام سے ہر چیز کی ہلاکت مراد نہیں ہے بلکہ خاص انسانوں اور مویشیوں کی ہی ہلاکت مراد ہے، اسی طرح ”كُلُّ بِدْعَةٍ ضَلَالَةٌ“ میں ”كُلُّ بِدْعَةٍ“ جو بظاہر عام ہے، اپنے عموم پر باقی نہیں رہی۔ جیسا مسلم کی مذکورہ حدیث سے ثابت ہوچکا ہے، بلکہ اس سے مراد ”كُلُّ بِدْعَةٍ سَيِّئَةٍ ضَلَالَةٌ“ ہے صرف وہی بدعت گمراہی ہے جو سیئہ ہو۔12 عرباض بن ساریہ رضی اللہ عنہ کی مذکور الصدر حدیث کی روایت امام احمد، ابوداؤد و بیہقی نے کی ہے اور ترمذی اور ابن ماجہ نے بھی اسی طرح روایت کی ہے اور ترمذی نے کہا ہے کہ یہ حدیث حسن صحیح ہے۔

ہوسکو، اس سے معلوم ہوا کہ حضرت عمر فاروق رضی اللہ عنہ نے تراویح باجماعت کو جو رائج فرما دیا اس پر عمل کرنا عین ہدایت ہے اور مثل حضور صلی اللہ علیہ وآلہ وسلم کی سنت کے عین سنت مؤکدہ ہے)۔ (اس حدیث کی روایت ترمذی، امام احمد اور ابن ماجہ نے کی ہے، ترمذی نے اس کو حسن قرار دیا ہے، اور ابن حبان اور حاکم نے اس کو صحیح قرار دیا ہے۔)

(یہاں حضرت عمر نے نفس تراویح کو بدعت نہیں فرمایا، اور نہ تراویح کی جماعت کو، کیونکہ تراویح اور تراویح باجماعت رسول اللہ صلی اللہ علیہ وآلہ وسلم سے قولاً اور فعلاً ثابت ہے تو حضرت عمر نے مسلمانوں کو مسجد نبوی میں ایک ہی امام کے پیچھے مہینہ بھر تراویح پڑھنے کا جو حکم دیا اور اس کو ہمیشہ کے لئے جاری فرمایا، اسی کو آپ نے ”نِعْمَتِ الْبِدْعَةُ بِدْعَةٌ حَسَنَةٌ“ فرمایا، واضح ہو کہ حضرت عمر کے تراویح باجماعت کو ایک ہی امام کے پیچھے جاری کر دینے سے حقیقت میں مسلم کی اس حدیث کی تعمیل ہوئی جس میں حضور صلی اللہ علیہ وآلہ وسلم نے ارشاد فرمایا ہے: جس نے میرے بعد کوئی اچھا طریقہ ایجاد کیا تو اس کو اس اچھے طریقہ کے ایجاد کرنے کا ثواب ملے گا اور جو اس طریقہ پر عمل کرتے رہیں گے۔ ان سب کا بھی ثواب ملتا رہے گا۔ اسی لئے صاحب مرقات نے فرمایا ہے: چونکہ حضرت عمر نے ایک امام کے پیچھے تراویح باجماعت کو قائم کیا اور اس کو عام رواج دے دیا تو حضرت عمر کو اس کے ایجاد کرنے کا ثواب ملے گا۔ اور قیامت تک جو لوگ تراویح پڑھتے رہیں گے۔ ان سب کا ثواب بھی حضرت عمر رضی اللہ عنہ کو ملتا رہے گا اور اس سے تراویح پڑھنے والوں کے ثواب میں کسی قسم کی کمی نہیں ہوگی۔ (تراویح جس کو حضرت عمر رضی اللہ عنہ نے ایک امام کے پیچھے سب مسلمانوں کو جمع فرمایا تھا اس کے پڑھنے کے دو وقت ہیں: ایک سونے کے بعد اٹھ کر آخر رات میں تراویح ادا کرنا، دوسرے سونے سے پہلے اوّل رات تراویح ادا کر کے سو رہنا۔ ان دو وقتوں میں سے سونے کے بعد اٹھ کر تراویح پڑھنا افضل ہے) راوی کہتے ہیں کہ حضرت عمر رضی اللہ عنہ نے یہ بھی فرمایا کہ تم اوّل شب تراویح پڑھ کر سو رہتے ہو، حالانکہ اوّل شب سو کر آخر شب تراویح پڑھنا اوّل شب میں تراویح پڑھنے سے افضل ہے (مگر آخر شب میں اٹھ کر تراویح پڑھنے کا بھروسہ نہ ہونے سے اوّل شب تراویح پڑھنے پر عمل درآمد ہے)۔ (اس حدیث کی روایت بخاری نے کی ہے۔) ف: اس حدیث شریف میں مذکور ہے کہ حضرت عمر رضی اللہ عنہ نے ایک امام کے پیچھے تراویح باجماعت کو ”نِعْمَتِ الْبِدْعَةُ هٰذِهِ“ فرمایا۔ اس بارے میں علامہ ابن تیمیہ نے فرمایا ہے کہ تراویح شریعت میں بدعت نہیں ہے بلکہ تراویح رسول اللہ صلی اللہ علیہ وآلہ وسلم کے قول اور عمل کی وجہ سے سنت ہے، اس لئے کہ رسول اللہ صلی اللہ علیہ وآلہ وسلم نے ارشاد فرمایا ہے کہ اللہ تعالیٰ نے تم لوگوں پر رمضان کے روزے فرض قرار دئے ہیں اور میں تم لوگوں پر تراویح کو سنت قرار دیتا ہوں۔ اور اسی طرح تراویح باجماعت بھی بدعت نہیں ہے بلکہ تراویح باجماعت بھی شریعت میں سنت ہے اس لئے کہ رسول اللہ صلی اللہ علیہ وآلہ وسلم دو یا تین راتیں جماعت کے ساتھ تراویح پڑھائے اور یہ بھی ارشاد فرمایا کہ جب کوئی شخص امام کے ساتھ اس کے فارغ ہونے تک نماز پڑھے تو ایسے شخص کے لئے تمام رات نماز پڑھنے کا ثواب لکھا جاتا ہے۔ حدیث شریف میں یہ بھی مذکور ہے کہ رسول اللہ صلی اللہ علیہ وآلہ وسلم ایک رات اتنی دیر تک تراویح پڑھائے کہ صحابہ کرام کو سحری کے فوت ہوجانے کا اندیشہ ہوگیا تھا۔ اس حدیث کی روایت اصحاب سنن نے کی ہے، اور اس حدیث میں جماعت کے ساتھ تراویح پڑھنے کی بھی ترغیب دلائی گئی ہے، اس سے ثابت ہوتا ہے کہ تراویح باجماعت سنت مؤکدہ ہے۔ علاوہ ازیں رسول اللہ صلی اللہ علیہ وآلہ وسلم کے زمانہ میں صحابہ کرام مسجد نبوی میں مختلف جماعتوں کے ساتھ تراویح باجماعت پڑھا کرتے تھے، اور حضور علیہ الصلوٰۃ والسلام صحابہ کے اس عمل کو برقرار رکھتے اور ممانعت نہیں فرماتے تھے اور حضور کا صحابہ کے عمل کو برقرار رکھنا باجماعت تراویح کے سنت ہونے کی دلیل ہے۔ اب رہی یہ بات کہ حضرت عمر رضی اللہ عنہ نے تراویح باجماعت کو ”نعمت البدعة“، یعنی بدعت حسنہ فرمایا تو یہ لغت اور محاورہ کے اعتبار سے ہے نہ کہ حقیقی طور پر، اس لئے کہ ہر ایسا عمل جس کا ثبوت کتاب اللہ اور سنت رسول اللہ میں ہو، اس کو شریعت میں بدعت نہیں کہا جاتا۔ اگرچہ کہ اس کو عام محاورہ یا لغت کے اعتبار سے بدعت کہہ دیا جائے۔ یہاں یہ بات بھی واضح رہنی چاہئے کہ حضور صلی اللہ علیہ وآلہ وسلم کے ارشاد ”كُلُّ بِدْعَةٍ ضَلَالَةٌ“ (ہر بدعت گمراہی ہے) سے مراد ہر وہ عمل بدعت نہیں جو نیا ہو، بلکہ اس ارشاد سے صرف ایسا نیا کام بدعت ہے جو احکام شرعیہ کے خلاف ہو (جیسے معتزلہ اور قدریہ وغیرہ کے عقائد) تو جب ”كُلُّ بِدْعَةٍ ضَلَالَةٌ“ سے حضور کا منشا معلوم ہوگیا اور یہ بات بھی ثابت ہوئی کہ اور آخری دہے میں تیسری شب یا چوتھی شب صحابہ کرام تراویح پڑھنے کے لئے جمع ہوگئے تو حضور علیہ الصلوة والسلام باہر تشریف نہیں لائے۔ اور تشریف نہ لانے کی وجہ یہ فرمائی کہ میں آج محض اس وجہ سے باہر نہیں نکلا کہ کہیں تراویح بھی تم پر فرض نہ ہوجائے، اس لئے تم تراویح کو اپنے اپنے گھروں میں پڑھ لیا کرو۔ یہاں حضور کے اس ارشاد سے صاف طور پر معلوم ہوگیا کہ حضور کا تیسری یا چوتھی شب تراویح کے لئے باہر تشریف نہ لانا تراویح کے فرض ہوجانے کے خوف سے تھا تو اس سے یہ واضح ہوتا ہے کہ فرضیت کا خطرہ باقی تھا اور اگر فرضیت کا خوف نہ ہوتا تو حضور ﷺ باہر تشریف لاتے اور تراویح پڑھاتے، جب حضرت عمر رضی اللہ عنہ کا دور خلافت آیا تو آپ نے ایک ہی امام کے پیچھے سب کو تراویح باجماعت کے لئے جمع کردیا اور مسجد میں روشنی کروائی تو تراویح کی یہ مخصوص صورت یعنی مسجد میں ایک امام کے پیچھے سب کا جمع ہونا اور روشنی کروانا ایسا عمل ہوا جس کو صحابہ کرام نے اس سے پہلے نہیں دیکھا تھا اسی لئے حضرت عمر نے اس عمل کا نام بدعت رکھا، اس لئے کہ یہ لغت اور محاورہ کے لحاظ سے تو بدعت ہے لیکن شریعت میں بدعت نہیں ہے۔ اس کی وجہ یہ ہے کہ از روئے سنت یہ عمل صالح ہے کیونکہ اب فرضیت کا اندیشہ دور ہوگیا اور فرضیت کا یہ اندیشہ رسول اللہ صلی اللہ علیہ وآلہ وسلم کی وفات مبارک سے باقی نہ رہا۔ اس طرح ثابت ہوا کہ تراویح باجماعت کے سنت ہونے کے معارض اور مانع کوئی چیز نہ رہی تو تراویح باجماعت قرآن مجید کے جمع کرنے کی طرح بدعت حسنہ قرار پائی۔

فصل سوم میں یہ مذکور ہے کہ (20) رکعت تراویح کا ادا کرنا سنت مؤکدہ ہے اس لئے کہ خلفائے راشدین نے (20) رکعت تراویح پر پابندی فرمائی ہے اور اس کو ہمیشہ ادا کیا ہے اور اس سے پہلے حدیث گزر چکی ہے جس میں حضور صلی اللہ علیہ وآلہ وسلم نے ارشاد فرمایا ہے کہ تم میری سنت اور خلفائے راشدین کی سنت کو مضبوطی سے تھامے رہو۔ اس حدیث سے ثابت ہوتا ہے خلفائے راشدین کی سنت کی اتباع بھی لازمی ہے اور خلفاء راشدین کی سنت کا تارک گنہگار ہوگا۔ چونکہ خلفائے راشدین سے (20) رکعت تراویح ثابت ہے اس لئے (20) رکعت تراویح سنت مؤکدہ ہے اور اسی پر ہر زمانہ میں عمل درآمد رہا ہے۔

ف: اس حدیث شریف میں سائب بن یزید رضی اللہ عنہ نے فرمایا ہے کہ ہم حضرت عمر رضی اللہ عنہ کے زمانہ میں تراویح کے 20 رکعت پڑھا کرتے تھے۔ اس بارے میں علامہ عینی رحمہ اللہ نے فرمایا کہ صحابہ کرام رضی اللہ عنہم کسی معاملہ میں یوں فرمائیں کہ ”ہم ایسا کرتے تھے“ یا ”ہم کو ایسا حکم دیا گیا ہے“ یا ”ہم کو فلاں کام سے منع کیا گیا ہے تو واضح رہے کہ صحابہ کرام کا اس طرح فرمانا حقیقت میں وہ حکم یا ممانعت اللہ اور اللہ کے رسول صلی اللہ علیہ وآلہ وسلم کی طرف سے سمجھی جائے گی اور صحابہ کرام کے اس طرح بیان کرنے سے یہ مراد ہوتی ہے کہ اس چیز کے جواز یا اس کی حلت اور حرمت کو ثابت کیا جائے نہ اس کام کی شرعی حیثیت بیان کی جائے۔ علماء نے لکھا ہے کہ صحابہ کرام کے ایسے اقوال مرفوع کے حکم میں ہوتے ہیں۔ یعنی رسول اللہ صلی اللہ علیہ وآلہ وسلم کے حکم دینے یا منع فرمانے کے قائم مقام سمجھے جائیں گے۔ اس اصول سے ثابت ہوا کہ صحابہ کا یہ فرمانا کہ ”ہم تراویح کے 20 رکعت پڑھا کرتے تھے‘‘ رسول اللہ صلی اللہ علیہ وآلہ وسلم کے فرمانے کے قائم مقام ہے اس لئے تراویح کے 20 رکعت سنت مؤکدہ ہیں۔12

ف: اس حدیث شریف میں تراویح کے 20 رکعت پانچ ترویحات کے ساتھ پڑھنے کا ذکر ہے ردالمحتار میں قہستانی کے حوالے سے مذکور ہے کہ ہر ترویحہ یعنی ہر چار رکعت کے بعد یہ تسبیح پڑھنا چاہئے: ’’سُبْحَانَ ذِي الْمُلْكِ وَالْمَلَكُوْتِ‘‘ اے اللہ! ہر عیب سے آپ پاک ہیں، حقیقی بادشاہت آپ ہی کی ہے اور ساری مخلوق پر آپ ہی کو کامل اختیار ہے۔ ’’سُبْحَانَ ذِي الْعِزَّةِ وَالْعَظَمَةِ وَالْقُدْرَةِ وَالْكِبْرِيَاءِ وَالْجَبَرُوْتِ‘‘۔ پھر عرض کرتا ہوں کہ سارے مخلوقات کے صفات سے آپ پاک ہیں، اور ساری عزت آپ ہی کی ہے، آپ ہی بڑے عظمت والے ہیں، ہر چیز پر آپ کو قدرت حاصل ہے، آپ جو چاہیں کرتے ہیں، کوئی آپ کو روکنے والا نہیں، ہر طرح کی بڑائی کے آپ ہی سزاوار ہیں، عظمت وجلال کے آپ ہی لائق ہیں۔ سُبْحَانَ الْمَلِكِ الْحَيِّ الَّذِيْ لَا يَمُوْتُ سُبُّوْحٌ قُدُّوْسٌ رَبُّ الْمَلَائِكَةِ وَالرُّوْحِ اے اللہ! آپ ہر نقص سے پاک ہیں اور ایسے بادشاہ ہیں کہ آپ کی بادشاہت کے سامنے سب کی بادشاہت ہیچ ہے۔ (ہر زندہ کو موت آنے والی ہے)، اور آپ ایسے زندہ ہیں کہ کبھی آپ کو موت نہیں آئے گی۔ (انسان بھی پاک ہے مگر عارضی) آپ پاک ہیں دائمی، انسانی صفات سے اور انسانی احتیاج سے آپ بالکل پاک ہیں، آپ کی شان کا کیا کہنا فرشتوں اور جبرئیل علیہ السلام کے آپ رب ہیں۔ لَا اِلٰهَ اِلَّا اللّٰهُ آپ کے سوا کوئی عبادت کے لائق نہیں، آپ ہی معبود ہیں، یکتا ہیں، کوئی آپ کا شریک نہیں۔ نَسْتَغْفِرُ اللّٰهَ آپ کے ان عالی صفات کو سن کر اپنی عاجزی اور مجبوری یاد آگئی۔ اس لئے عرض کرتے ہیں کہ ہم سراپا قصور ہیں، آپ ہی سے ہم تمام گناہوں کی مغفرت چاہتے ہیں۔ نَسْأَلُكَ الْجَنَّةَ آپ کے صفات عالیہ کا صدقہ ہمارے اعمال کو مت دیکھئے اپنے فضل و کرم سے ہم کو جنت عطا فرمائیے۔ وَنَعُوذُ بِكَ مِنَ النَّارِ ہم اپنے گناہوں کی وجہ سے ڈرے ہوئے سہمے ہوئے ہیں آپ کے رحم و کرم کا صدقہ دوزخ کی آگ سے ہم کو بچائیے۔ ردالمحتار میں یہ بھی لکھا ہے کہ اس تسبیح کو ہر ترویحہ کے بعد تین بار پڑھنا چاہیے۔12

ف: تراویح جیسے مردوں کے لئے سنت مؤکدہ ہے ایسے ہی عورتوں کے لئے بھی 20 رکعت سنت مؤکدہ ہے اس لئے ان کو بھی چاہیے کہ فرض نمازوں کی طرح اپنے اپنے گھروں میں رمضان میں عشاء کے فرض و سنت اور نفل کے بعد دو دو رکعت کی نیت باندھ کر 20 رکعت تراویح پڑھا کریں، اور جب تراویح کے 20 رکعت ادا کر چکیں تو نماز وتر پڑھیں۔ (طحطاوی)

ف: اس حدیث شریف میں ارشاد ہے کہ شب براءت میں ایسے مسلمان کی بخشش نہیں ہوتی جو کسی مسلمان سے کینہ رکھے یا کسی کو ناحق قتل کردے۔ اس بارے میں صاحب مرقات نے لکھا ہے کہ اللہ تعالیٰ اس رات: بجز کفر کے تمام حقوق اللہ معاف فرما دیتے ہیں البتہ حقوق العباد کو معاف نہیں فرماتے یہاں تک وہ توبہ کرلے۔