Hadith 2658

حضرت انس رضی اللہ عنہ سے روایت ہے وہ فرماتے ہیں کہ رسول اللہ صلی اللہ علیہ وسلم نے ایک دفعہ اُبیّ بن کعب انصاری رضی اللہ عنہ سے فرمایا کہ اللہ تعالیٰ نے مجھے حکم دیا ہے کہ میں تم کو قرآن پڑھ کر سناؤں (یہ سن کر حضرت ابی بن کعب رضی اللہ عنہ نے تعجب اور اشتیاق کے لہجہ) میں دریافت کیا: یا رسول اللہ کیا اللہ تعالیٰ نے میرا نام لے کر حضور کو یہ حکم دیا ہے؟ حضور نے فرمایا: ہاں تو حضرت اُبی نے پھر عرض کیا: کیا سارے جہانوں کے پروردگار کی جناب میں میرا ذکر آیا ہے؟ تو حضور صلی اللہ علیہ وسلم نے فرمایا: ہاں۔ یہ سن کر حضرت اُبیّ کے دونوں آنکھوں سے آنسو جاری ہو گئے۔ اور ایک دوسری روایت میں یہ ہے کہ اللہ تعالیٰ نے مجھے حکم دیا ہے کہ میں تم کو سورہ ”لَمْ يَكُنِ الَّذِينَ كَفَرُوا“ (سورة البينة) پڑھ کر سناؤں تو حضرت ابی نے عرض کیا کہ: ( یا رسول اللہ کیا اللہ نے میرا نام لے کر یہ فرمایا ہے) تو حضور نے فرمایا: ہاں تو یہ سن کر حضرت اُبی رونے لگے (حضرت اُبی کا یہ اعزاز نتیجہ تھا قرآن سے الفت اور حضور صلی اللہ علیہ وسلم سے الفت کا۔ اس حدیث کی روایت بخاری اور مسلم نے متفقہ طور پر کی ہے۔