Hadith 3098a

ف: حدیث شریف میں ارشاد ہے کہ اللہ تعالیٰ اس گھر میں ذلّت داخل کرتے ہیں جس گھر میں کھیتی کے آلات داخل ہوتے ہیں یعنی جو قوم جہاد چھوڑ دیتی ہے اور کھیتی باڑی میں مشغول ہو جاتی ہے تو وہ ذلیل اور خوار ہو جاتے ہیں کہ حاکم ان کو محصول کے واسطے پکڑتا ہے اور ذلیل کرتا ہے۔ حدیث شریف میں اس بات کا ارشاد ہے کہ مسلمان جہاد نہ چھوڑیں اور دنیا کمانے میں مشغول نہ ہوں ورنہ وہ ذلیل و خوار ہوں گے اور کافر غالب ہو جائیں گے جیسا کہ اس زمانے میں ہو رہا ہے۔ صاحب مرقات نے لکھا ہے کہ حدیث شریف میں زراعت کرنے کی جو وعید وارد ہے وہ ایسی قوم سے متعلق ہے جن کی سرحدیں دشمن سے قریب ہیں اور وہ صرف کھیتی باڑی میں مشغول رہتے ہیں اور جہاد کو چھوڑ دیا ہے اور اسی صورت میں دشمن ان پر غالب آ جائے گا اور وہ ذلیل و خوار ہوں گے۔ حضور نبی کریم صلی اللہ علیہ وآلہ وسلم نے اس وجہ سے بھی صرف زراعت میں مشغول ہو جانے کی وعید ارشاد فرمائی تا کہ صحابہ کرام رضی اللہ عنہم کھیتی باڑی اور گھروں کی تعمیر میں مشغول ہو کر جہاد نہ چھوڑ بیٹھیں جس کے نتیجہ میں کفار غالب ہو جائیں اس سے بڑھ کر مسلمان کے لئے اور کیا ذلت ہو سکتی ہے، ورنہ زراعت تو مستحب ہے اس لئے کہ زراعت کرنے میں انسانوں کا نفع ہے۔