Hadith 3158

ابن عباس اور ابن عمر رضی اللہ عنہم سے روایت ہے کہ رسول اللہ صلی اللہ علیہ وآلہ وسلم نے ارشاد فرمایا ہے کہ جو شخص عرفات میں (کم از کم) رات میں (تھوڑی دیر کے لئے بھی) ٹھہر جائے تو اس کو حج مل گیا (اگرچہ وقوف عرفہ کا وقت نویں ذوالحجہ کے زوال سے لے کر دسویں ذوالحجہ کی فجر سے پہلے تک ہے) اور جس کسی کو رات میں بھی وقوف عرفات کا موقع نہ ملے تو اس کا حج فوت ہو گیا، تو اس کو چاہئے کہ (حج کے بقیہ مناسک چھوڑ دے (اور صرف) عمرہ کے افعال ادا کر کے (یعنی طواف اور سعی بین الصفا والمروۃ کے بعد سر مونڈھوا کر) احرام کھول دے اور (اس فوت شدہ حج کی) آئندہ سال قضاء کر لے۔ (اور اس پر محصر کی طرح قربانی ادا کرنا واجب نہیں ہے)۔ اس کو دار قطنی نے اپنی سنن میں اور ابن عدی نے الکامل میں روایت کیا ہے۔ اور امام محمد رحمہ اللہ کی ایک روایت میں اسود بن یزید رحمہ اللہ سے اس طرح مروی ہے، اسود بن یزید کہتے ہیں کہ میں نے امیر المومنین حضرت عمر بن خطاب رضی اللہ عنہ سے دریافت کیا کہ جس شخص کا حج فوت ہو جائے تو وہ کیا کرے؟ آپ نے فرمایا وہ عمرہ ادا کر کے احرام کھول دے اور اس پر آئندہ سال (فوت شدہ) حج کی قضاء واجب ہوگی۔ اور حضرت عمر رضی اللہ عنہ نے قربانی کا ذکر نہیں فرمایا (یعنی حج کے فوت ہونے کی صورت میں محرم پر قربانی دینا واجب نہیں۔ جیسا کہ احصار کی صورت میں قربانی دینا واجب ہے) اسود بن یزید کہتے ہیں کہ میں نے یہی مسئلہ حضرت زید بن ثابت رضی اللہ عنہ سے دریافت کیا تو حضرت زید بن ثابت نے بھی حضرت عمر رضی اللہ عنہ کی طرح جواب دیا۔ (چنانچہ ہدایہ میں لکھا ہے کہ جو حج کا احرام باندھے اور اس سے وقوف عرفہ فوت ہو جائے تو اس کا حج فوت ہو گیا، تو اس کو چاہئے کہ طواف کرے، سعی کرے اور احرام کھول دے آئندہ سال فوت شدہ حج کی قضاء کرے اور اس پر قربانی دینا واجب نہیں ہے اور یہی مذہب حنفی ہے)۔