اردو
Urdu OCR, pending reviewNoor 3806
ابوہریرہ رضی اللہ عنہ سے روایت ہے: وہ فرماتے ہیں کہ رسول ﷺ ارشاد
فرماتے ہیں کہ اللہ تعالیٰ پاک ہیں اور پاک (یعنی حلال) چیزوں ہی کو قبول فرماتے ہیں اور اللہ
تعالیٰ نے مسلمانوں کو انہی چیزوں کا حکم دیا ہے جن کا حکم اپنے انبیاء اور رسولوں کو دیا ہے۔ چنانچہ
(اپنے کلام پاک میں) ارشاد فرمایا: ”اے میرے رسولو! پاک (یعنی حلال) چیزوں کو کھاؤ اور نیک
کام کرو“ اور اللہ تعالیٰ نے یہ بھی فرمایا ہے کہ ”اے ایمان والو! پاک یعنی حلال چیزوں کو کھاؤ جن کو
ہم نے تمہیں دیا ہے۔“ پھر حضور ﷺ نے ارشاد فرمایا کہ آدمی (عبادتوں یعنی حج اور جہاد کے لئے)
پراگندہ بال اور غبار آلود حال میں طویل سفر کرتا ہے اور آسمان کی طرف ہاتھوں کو اٹھا کر فریاد کرتا ہے
(اور پکارتا ہے) اے میرے پروردگار! اے میرے پروردگار! حالانکہ اس کا کھانا حرام ہے، اس کا
پینا حرام ہے، اور لباس حرام ہے اور اس کی پرورش بھی حرام (مال سے) ہوئی ہے تو ایسے شخص کی
دعا کب اور کیسے قبول ہوگی۔ اس کی روایت مسلم نے کی ہے۔
Possible references (unverified, pending editorial review)
- Candidate: Sahih Muslim 1015 (unverified) 99% confidence
- Candidate: Mishkat al-Masabih 2760 (unverified) 94% confidence
Mishkat (candidate) 2760
Confidence and text similarity are not editorial verification.
Commentary and footnotes (1)
Note 1
ف: صاحب مرقات رحمۃ اللہ علیہ نے لکھا ہے کہ بارگاہ خداوندی میں دعا کی قبولیت کے لئے دو بازو درکار ہیں ایک اکل حلال دوسرے صدق مقال یعنی حلال کی روزی کھانا اور سچ بولنا اور اشعۃ اللمعات میں لکھا ہے کہ اگر کسی شخص کی پرورش حرام روزی سے ہوئی لیکن اب حلال روزی کھا رہا ہے تو بھی اس کی دعا قبول نہ ہوگی جب تک صدق دل سے توبہ نہ کرے اور آئندہ کے لئے حلال خوری کا سچا عہد نہ کرلے۔ اس وقت اس کی دعا قبول ہوسکتی ہے۔