Hadith 3216

ام المؤمنین حضرت عائشہ صدیقہ رضی اللہ عنہا سے روایت ہے آپ فرماتے ہیں کہ حضرت ابوبکر صدیق رضی اللہ عنہ کا ایک غلام تھا جو اپنی کمائی میں سے آپ کو کچھ خراج یعنی مقررہ حصہ دیا کرتا تھا اور حضرت ابوبکر صدیق رضی اللہ عنہ اس کو لے لیا کرتے ایک دن اس نے کوئی کھانے کی چیز پیش کی آپ نے اس کو کھا لیا اس غلام نے عرض کیا آپ کو کچھ معلوم ہے یہ چیز کیا تھی (اور میں نے کہاں سے لائی تھی؟) حضرت ابوبکر رضی اللہ عنہ نے فرمایا کہ تو ہی بتا کہ وہ کیا چیز ہے اس نے کہا کہ میں زمانہ جاہلیت میں (جب کہ کافر تھا) غیب کی باتیں بتاتا (اور اس پر معاوضہ بھی لیتا) اور میں اس میں ماہر بھی نہیں تھا، تو ایک شخص کو میں نے غیب کی باتیں بتائیں اور میں نے (عدم مہارت کی وجہ سے) اس کو دھوکہ دیا آج (اتفاق سے) اس سے ملاقات ہوگئی اور اس نے (معاوضہ میں) یہ چیز دی اور میں نے آپ کی خدمت میں پیش کیا اور آپ نے اس میں سے کچھ تناول فرما لیا۔ ام المومنین حضرت عائشہ رضی اللہ عنہا فرماتی ہیں کہ (یہ سن کر) حضرت ابوبکر صدیق رضی اللہ عنہ نے (حلق میں) انگلیاں ڈالیں اور جو کچھ پیٹ میں تھا اس کو قے کر دیا (اور یہ بھی فرمایا اے اللہ! میرے بس میں جو بھی تھا میں نے اس کو نکال دیا اور جو رہ گیا ہے اس کو معاف فرما دے) اس کی روایت بخاری نے کی ہے۔