Hadith 3921

اُبی سے روایت ہے کہ رسول اللہ صلی اللہ علیہ وسلم نے فرمایا نبیوں میں سے ایک نبی نے جہاد کیا تو قوم سے فرمایا: میرے ساتھ ایسا کوئی شخص نہ آئے جس نے کسی خاتون سے نکاح کیا ہے اور اس کے ساتھ خلوت کرنا چاہتا ہے مگر ابھی اس کے ساتھ خلوت نہیں ہوئی ہے اور نہ ایسا کوئی شخص جس نے گھر بنائے ہیں اور ابھی ان کے چھت نہیں ڈالے اور نہ ایسا کوئی شخص جس نے بکریاں خریدی ہیں یا حاملہ اونٹنیاں خریدی ہیں اور وہ ان کے بچے دینے کا انتظار کر رہا ہے۔ پس انہوں نے جنگ کی اور آبادی سے قریب پہنچ گئے عصر کا یا اس سے قریب وقت تھا۔ انہوں نے سورج سے فرمایا: بے شک تو بھی مامور ہے اور میں بھی مامور ہوں۔ اے اللہ تو اس کو ہم پر روک دے پس وہ روک دیا گیا یہاں تک کہ اللہ تعالیٰ نے ان کو کامیابی عطا فرمائی۔ پھر انہوں نے مال غنیمت کو جمع کیا تو آئی یعنی آگ اس کو کھانے کے لئے آئی تو وہ اس کو کھائی نہیں تو (اس نبی نے) فرمایا تم میں کوئی خیانت ہے پس ہر قبیلہ میں ایک آدمی میرے ہاتھ پر بیعت کرے۔ پس آپ کے ہاتھ سے ایک آدمی کا ہاتھ چمٹ گیا تو آپ نے فرمایا تم میں خیانت ہے پس اس قبیلہ کے لوگ گائے کے سر کے برابر سونا لے کر آئے اور اس کو رکھ دیا تو آگ آئی اور اس نے اس کو کھالیا۔2 ایک روایت میں یہ زیادہ ہے۔ اموال غنیمت تم سے پہلے کسی کے لئے بھی حلال نہیں کیا گیا تھا۔ پھر اللہ تعالیٰ نے ہمارے لئے اموال غنیمت کو حلال کر دیا۔ اس نے ہماری ناتوانی اور کمزوری کو دیکھا تو اس کو ہمارے لئے حلال کر دیا۔ (متفق علیہ)