Hadith 5350

حضرت عبد اللہ بن عمرو رضی اللہ تعالیٰ عنہما سے روایت ہے انہوں نے کہا: رسول اللہ صلی اللہ علیہ وسلم نے فرمایا: بے شک اللہ تعالیٰ قیامت کے دن میری امت میں سے ایک شخص کو تمام مخلوقات کے سامنے منتخب1 فرمائے گا، پس وہ اس پر ننانوے (99) رجسٹر پھیلا دے گا ہر رجسٹر تا حد نگاہ ہوگا، پھر وہ فرمائے گا: کیا تو اس میں سے کسی چیز کا انکار کرتا ہے؟ کیا تجھ پر میرے لکھنے والے نگراں فرشتوں نے ظلم کیا ہے؟ تو وہ عرض کرے گا، نہیں اے میرے رب! تو رب فرمائے گا کیا تیرے پاس کوئی عذر ہے؟ تو وہ عرض کرے گا، نہیں اے میرے رب! تو وہ فرمائے گا کیوں نہیں یقیناً تیری ہمارے پاس ایک نیکی ہے اور آج تجھ پر کچھ ظلم نہیں ہوگا، پس ایک پرچی نکالی جائے گی جس میں ”أَشْهَدُ أَنْ لَّا إِلٰهَ إِلَّا اللّٰهُ وَأَشْهَدُ أَنَّ مُحَمَّدًا عَبْدُهُ وَرَسُولُهُ“ ہوگا (میں گواہی دیتا ہوں کہ اللہ کے سوا کوئی معبود نہیں اور حضرت محمد مصطفیٰ صلی اللہ علیہ وسلم اسکے بندے اور اسکے رسول ہیں) تو رب تعالیٰ فرمائے گا: تو اپنے تول کے پاس حاضر ہو جا2 تو وہ عرض کرے گا اے میرے رب! یہ ایک پرچی ان دفتروں کے مقابل میں ہوگی، تو رب تعالیٰ فرمائے گا تجھ پر کچھ بھی ظلم نہیں کیا جائے گا، آپ صلی اللہ علیہ وسلم نے فرمایا: پس رجسٹر ایک پلہ میں رکھے جائیں گے اور وہ پرچی ایک پلہ میں رکھ دی جائے گی، تو دفتر ہلکے ہوجائیں گے اور پرچی بھاری ہوجائے گی پس اللہ کے نام کے مقابلہ میں کوئی چیز وزن نہیں ہوگی۔ (ترمذی، ابن ماجہ)۔