(اس کتاب میں زکات کا بیان ہے)

ف: اس حدیث شریف میں ارشاد ہے کہ زکات مالداروں سے لی جائے گی۔ مرقات اور عمدۃ القاری میں لکھا ہے کہ حدیث شریف کے لفظ ”اَغْنِيَائِهِمْ“ سے مراد مکلفین ہیں اور مکلفین سے ایسے صاحب نصاب مراد ہیں جو عاقل و بالغ ہوں۔ اس لئے زکات عاقل پر فرض ہوگی مجنون پر فرض نہ ہوگی اور ایسے ہی زکات بالغ پر فرض ہوگی، نابالغ پر فرض نہ ہوگی۔ اس کی تائید ام المؤمنین حضرت عائشہ رضی اللہ عنہا کی اس حدیث سے ہوتی ہے کہ حضور صلی اللہ علیہ وآلہ وسلم ارشاد فرمائے ہیں کہ تین شخص مرفوع القلم ہیں یعنی ان کے اعمال لکھے نہیں جاتے اور نہ ان کا مؤاخذہ ہوتا ہے۔ ایک سونے والا کہ جب تک کہ وہ نہ جاگے۔ دوسرا بچہ جب تک کہ وہ بالغ نہ ہو۔ تیسرا مجنون جب تک کہ اس کا جنون ختم نہ ہو جائے۔ اس حدیث شریف سے بچے اور مجنون کا غیر مکلف ہونا ثابت ہوتا ہے۔ اس بناء پر سفیان ثوری، عبدالرحمن بن مبارک، ابو وائل، سعید بن جبیر، نخعی، شعبی، حسن بصری۔ رحمہم اللہ۔ اس بات کے قائل ہیں کہ یتیم کے مال پر زکات واجب نہیں اور حضرت حسن بصری رحمۃ اللہ علیہ سے منقول ہے کہ یتیم کے مال پر زکات واجب نہ ہونے کے بارے میں صحابہ کرام رضی اللہ عنہم۔ کا اجماع ہے اور امام ابو حنیفہ رحمہ اللہ اور آپ کے شاگردوں کا بھی یہی مذہب ہے۔ اور سعید بن المسیب نے فرمایا ہے کہ جس شخص پر نماز اور روزہ فرض ہے، زکات بھی اسی شخص پر فرض ہوگی، اس سے معلوم ہوا کہ چونکہ نابالغ اور مجنون پر نماز اور روزہ فرض نہیں ہے، اسی لئے ان پر زکات بھی فرض نہ ہوگی اور حمید بن زنجویہ نے بیان کیا ہے کہ ابن عباس رضی اللہ عنہما کا بھی یہی مذہب ہے کہ مجنون اور نابالغ پر زکات فرض نہیں ہے، اور مبسوط میں لکھا ہے کہ حضرت علی رضی اللہ عنہ کا بھی یہی قول ہے کہ مجنون اور بچے پر زکات فرض نہیں ہے اور امام جعفر صادق رحمہ اللہ نے اپنے والد امام محمد باقر رحمہ اللہ سے یہی روایت کی ہے اور قاضی شریح بھی اسی کے قائل ہیں کہ نابالغ اور مجنون پر زکات فرض نہیں ہے جیسا کہ نسائی نے روایت کی ہے، یہ پورا مضمون بنایہ اور عمدۃ القاری سے ماخوذ ہے۔12

دوزخ میں بھیج دئے جائیں گے (صاحب مرقات اور اشعۃ اللمعات نے بیان کیا ہے کہ حدیث شریف میں پہلو، پیشانی اور پشت کو داغ دئے جانے کا جو ذکر آیا ہے اس کی ایک وجہ تو یہ ہے کہ یہ تینوں جسم کے اشرف اعضاء ہیں کہ اعضاء رئیسہ دل، دماغ اور جگر ان ہی میں ہیں۔ ان اعضاء کے داغ دینے کی دوسری وجہ یہ ہے کہ ان ہی اعضاء کی زیب و زینت کے لئے اس نے مال جمع کیا اور زکات دینے سے گریز کیا، ان اعضاء کو داغ دینے کی تیسری وجہ یہ ہے کہ ان ہی اعضاء سے اس نے سائل کو تکلیف پہنچائی۔ پہلو پر اس لئے داغ دیا جائے گا کہ سائل کے سوال پر پہلو تہی کیا اور پیشانی کو اس لئے داغا جائے گا کہ سائل کو دیکھ کر منھ پھیر لیا، اور پیٹھ کو اس لئے داغا جائے گا کہ حاجتمند سے پیٹھ پھیرا) (رسول اللہ صلی اللہ علیہ وآلہ وسلم سے سونے چاندی کی زکات ادا نہ کرنے کی وعید کو سن کر) صحابہ نے عرض کیا: یا رسول اللہ (یہ تو زرِ نقد کا حکم تھا اب ارشاد ہو کہ) اونٹوں (اونٹوں کی زکات کا نصاب آئندہ باب میں آ رہا ہے۔12) کے متعلق کیا حکم ہے؟ حضور صلی اللہ علیہ وآلہ وسلم نے ارشاد فرمایا کہ (اونٹ والے پر دو حق ہیں، ایک حق تو اونٹوں کی زکات ادا کرنے کا ہے جو فرض ہے دوسرا حق جو مستحب ہے یہ ہے) کہ اونٹوں کا دودھ اس دن نکالا جائے جس دن ان کے پانی پینے کی باری ہوتی ہے (تاکہ فقراء جو ایسے موقعوں پر جمع ہو جاتے ہیں وہ پی کر دودھ سے شکم سیر ہو سکیں، اور یہ حکم مستحب ہے)۔ حضور صلی اللہ علیہ وآلہ وسلم نے اونٹوں کی زکات نہ دینے والے شخص کے بارے میں ارشاد فرمایا کہ ایسے شخص کو قیامت کے دن ایک ہموار میدان میں منہ کے بل اوندھا ڈالا جائے گا اور اس کے سارے اونٹ وہاں پوری تعداد میں موجود ہوں گے ان میں ایک بچہ بھی کم نہ ہوگا، اور وہ خوب موٹے تازے ہوں گے یہ اونٹ اپنے مالک کو اپنے پاؤں سے روندیں گے اور کچلیں گے اور اپنے دانتوں سے کاٹیں گے اور جب ان اونٹوں کی ایک قطار اس طرح روند کر، کچل کر، اور کاٹ کر گزر جائے گی، تو اونٹوں کی دوسری قطار روندنے، کچلنے اور کاٹنے کے لئے آ جائے گی، اور اس طرح یہ عمل اس دن ہوتا رہے گا کہ جس کی مقدار (دنیا کے) پچاس ہزار برسوں کے برابر ہوگی یہاں تک کہ بندوں کا حساب و کتاب ختم ہو جائے گا اور جنتی جنت میں اور دوزخی دوزخ میں بھیج دئے جائیں گے حضور صلی اللہ علیہ وآلہ وسلم سے یہ سن کر صحابہ نے عرض کیا: یا رسول اللہ گائے اور بکریوں کے مالک کا کیا ہوگا (جس نے صاحب نصاب ہونے کے باوجود ان کی زکات نہ دی ہو)۔ حضور صلی اللہ علیہ وسلم نے گائے اور بکریوں کی زکات (گائے اور بکریوں کی زکات کا نصاب آئندہ باب میں آ رہا ہے۔12) نہ دینے والے شخص کے بارے میں ارشاد فرمایا کہ ایسے شخص کو قیامت کے دن ایک ہموار میدان میں منہ کے بل اوندھا ڈالا جائے گا اور اس کی سارے گائیں اور بکریاں وہاں پوری تعداد میں موجود ہوں گی، ان میں ان کا ایک بچہ بھی کم نہ ہوگا۔ ان کے سینگ نہ تو مڑے ہوئے ہوں گے نہ تو ٹوٹے ہوئے ہوں گے اور نہ وہ بے سینگ کے ہوں گے (یعنی سب کے سروں پر سینگ ہوں گے، اور سینگ صحیح و سالم ہوں گے تاکہ) یہ گائے اور بکریاں ان سینگوں سے اپنے اس مالک کو ماریں (جس نے ان کی زکات نہ دی ہو) اور اپنے کھروں سے اس کو کچلیں گے اور روندتے ہوئے گزر جائیں گے اور جب ان گائے اور بکریوں کی ایک قطار اس طرح سینگوں سے مارتی ہوئی اور پیروں سے کچلتی ہوئی گزر جائے گی تو ان کی دوسری قطار مارنے اور کچلنے کے لئے آ جائے گی، اور اسی طرح یہ عمل اس دن ہوتا رہے گا۔ جس کی مقدار (دنیا کے) پچاس ہزار برسوں کے برابر ہوگی، یہاں تک کہ بندوں کا حساب و کتاب ختم ہو جائے گا اور جنتی جنت میں اور دوزخی دوزخ میں پہنچ دیئے جائیں گے (اس حدیث شریف میں کئی بار یہ ذکر ہے کہ قیامت کا دن دنیا کے پچاس ہزار برس کے برابر ہوگا۔ اس بارے میں صاحب مرقات اور اشعۃ اللمعات نے لکھا ہے کہ اس دن کی پچاس ہزار کے برابر درازی کافروں کے لئے اور گنہگاروں کے لئے اس دن کی درازی ان کے گناہوں کے لحاظ سے ہوگی اور نیکوکار مؤمنین پر یہ دن اتنی دیر میں گزر جائے گا جتنی دیر میں فجر کی دو رکعتیں ادا کی جاتی ہیں۔ حضور صلی اللہ علیہ وآلہ وسلم سے پھر عرض کیا گیا: یا رسول اللہ! گھوڑوں (گھوڑوں کی زکات کے بارے میں تفصیلات آئندہ باب میں آ رہی ہیں۔12) کے متعلق کیا حکم ہے؟ حضورؐ ارشاد فرمائے سنو! گھوڑے تین قسم کے ہوتے ہیں: (1) ایک تو وہ گھوڑے ہیں جو اپنے مالک کے لئے گناہ کا سبب بنتے ہیں، (2) دوسرے وہ گھوڑے ہیں جو اپنے مالک کے لئے پردہ ہوتے ہیں، یعنی گھوڑوں کی وجہ سے وہ معزز سمجھا جاتا ہے اور اس کی محتاجی کا گمان کسی کو نہیں ہوتا، اور (3) تیسرے وہ گھوڑے ہیں جو اپنے مالک کے لئے ثواب کا ذریعہ بنتے ہیں۔ وہ گھوڑے جو مالک کے لئے گناہ کا سبب ہوتے ہیں اس شخص کے گھوڑے ہیں جن کو مالک نے فخر و غرور اور ریاء کے لئے باندھ رکھا ہے یا مسلمانوں کے خلاف استعمال کرنے کے لئے رکھ چھوڑا ہے تو ایسے گھوڑے (اس شخص کی ایسی نیت کی وجہ سے) اس کے لئے گناہ کا سبب ہوتے ہیں۔ دوسرے وہ گھوڑے جو اپنے مالک کے لئے پردہ (عزت) کا سبب ہوتے ہیں، ایسے گھوڑے ہیں جن کو ان کے مالک نے خدا کی راہ میں اطاعت اور بندگی کی غرض سے باندھ رکھا ہے اور جو حقوق گھوڑوں کی پیٹھوں اور گردنوں سے متعلق ہیں ان کو ادا کرنا بھی نہیں بھولا ہے۔ (مثلاً کسی کی ضرورت پر ان کو مستعار دیا کرتا ہے) تو ایسے گھوڑے اپنے مالک کی عزت کا سبب بنتے ہیں۔ تیسرے وہ گھوڑے ہیں جو اپنے مالک کے لئے اجر وثواب کا سبب ہوتے ہیں، اور یہ اس شخص کے گھوڑے ہوتے ہیں جن کو مالک نے جہاد فی سبیل اللہ کے لئے چراگاہوں اور سبزہ زاروں میں باندھ رکھا ہے، ان چراگاہوں اور سبزہ زاروں میں سے یہ گھوڑے جس قدر کھائیں گے اس سبزہ کی مقدار کے موافق اس کے مالک کے حق میں نیکیاں لکھی جائیں گی اور ان گھوڑوں کی لید اور پیشاب کا شمار بھی نیکیوں میں ہوتا ہے حتی کہ اگر کوئی گھوڑا اپنی رسی تڑا کر ایک یا دو ٹیلوں پر چھلانگتا ہے تو بھی اللہ تعالیٰ اس گھوڑے کے قدموں کے نشانات کی تعداد کے برابر (اور اس دوڑنے کی حالت میں جو لید کرتا ہے) اس کی لید کی مقدار کے موافق اس کے مالک کے حق میں نیکیاں لکھ دیتے ہیں، اگر مالک ان گھوڑوں کو لے کر کسی نہر پر سے گزرے اور مالک کے ان گھوڑوں کو پانی پلانے کے ارادے کے بغیر بھی یہ گھوڑے پانی پی لیں تو پئے ہوئے پانی (کے قطرات کی تعداد) کے برابر اللہ تعالیٰ اس کے مالک کے نامہ اعمال میں نیکیاں لکھ دیتے ہیں (اس سے معلوم ہوا کہ مالک کی نیت اور ارادہ کے بغیر گھوڑوں کے پانی پی لینے پر جب اتنا بڑا ثواب دیا جاتا ہے تو جب مالک ان کو ارادہ اور نیت کے ساتھ پانی پلاتا ہوگا تو اس ثواب کا کیا پوچھنا!) یہ سن کر صحابہ رضی اللہ عنہم نے عرض کیا: یا رسول اللہ صلی اللہ علیہ وسلم! گدھوں کے متعلق کیا حکم ہے؟ حضور صلی اللہ علیہ وآلہ وسلم ارشاد فرمائے: گدھوں کے متعلق مجھ پر تو کوئی خاص حکم نازل نہیں ہوا، ہاں یہ جامع آیت موجود ہے: (پ:30،سورہ زلزال،ع:1،آیت نمبر:7-8،میں) ”فَمَنْ يَعْمَلْ مِثْقَالَ ذَرَّةٍ خَيْرًا يَرَهُ. وَمَنْ يَعْمَلْ مِثْقَالَ ذَرَّةٍ شَرًّا يَرَهُ“۔ جو شخص (دنیا میں) ذرہ برابر نیکی کرے گا وہ اس کو قیامت میں دیکھ لے گا، اور جو شخص (دنیا میں) ذرہ برابر بھی بدی کرے گا وہ بھی اس کو قیامت میں دیکھ لے گا۔ (صاحب مرقات نے لکھا ہے کہ حضور صلی اللہ علیہ وآلہ وسلم نے گدھے کے متعلق سے اس آیت کو جو بیان فرمایا ہے اس کا منشا یہ ہے کہ اگر گدھے کو کسی نیک کام میں استعمال کرے گا تو اس کے مالک کو اس کی نیت کے مطابق اجر ملے گا اور اگر کسی برے کام میں اس کو استعمال کرے تو اس کے مالک کو اس کی سزا ملے گی، صاحب مرقات نے یہ بھی لکھا ہے کہ آیت مذکورہ اتنی جامع اور مانع ہے کہ باوجود الفاظ کی کمی کے ایسے معنی اور مطالب کے لحاظ سے ہر عمل نیک وبد پر حاوی ہے)۔ اس حدیث کی روایت مسلم نے کی ہے۔

ف: حدیث شریف میں انگلیوں کے چبائے جانے کا جو ذکر ہے، اس کے تعلق سے اشعۃ اللمعات میں کہا ہے کہ مال کے جمع اور خرچ کرنے میں ہاتھ کی انگلیوں ہی کو دخل ہوتا ہے۔12

ف(1): اس حدیث شریف میں حضرت عباس رضی اللہ عنہ کی زکات کے بارے میں رسول اللہ صلی اللہ علیہ وآلہ وسلم کا ارشاد ہے: ”فَهِيَ عَلَيَّ وَمِثْلُهَا مَعَهَا“ یعنی حضرت عباسؓ کی دونوں سال کی زکات میں ہی ادا کروں گا، ایک تو سال حال کی، دوسرے سال گزشتہ کی۔ اس بارے میں مرقات اور اشعۃ اللمعات میں لکھا ہے کہ رسول اللہ صلی اللہ علیہ وآلہ وسلم نے کسی ضرورت پر حضرت عباس سے دو سال کی پیشگی زکات حاصل فرمائی تھی جیسا کہ بیہقی نے روضہ میں حضرت علی رضی اللہ عنہ سے اس کی روایت کی ہے اور امیر کو اس قسم کا اختیار ہے۔ حضرت عمر رضی اللہ عنہ ان تفصیلات سے ناواقف تھے، عام حکم کی بناء پر حضرت عباسؓ سے بھی تاکید کے ساتھ زکات کا مطالبہ فرمائے، اس پر رسول اللہ صلی اللہ علیہ وآلہ وسلم نے حضرت عمرؓ سے فرمایا کہ حضرت عباسؓ کے زکات نہ دینے پر تمہاری شدت خلاف واقعہ ہے۔ تم کو معلوم ہونا چاہئے کہ یہ میرے چچا ہیں اور باپ کے برابر ہیں۔12 ف(2): اس حدیث شریف میں یہ بھی ارشاد ہے: ”فَأَغْنَاهُ اللّٰهُ وَرَسُولُهُ“ اللہ اور اللہ کے رسولؐ نے اس کو یعنی ابن جمیل کو غنی بنا دیا۔ اس بارے میں اشعۃ اللمعات میں لکھا ہے کہ غنی بنا دینا حقیقت میں اللہ تعالیٰ کا فضل ہے اور رسول اللہ صلی اللہ علیہ وآلہ وسلم کی ذات گرامی کی طرف بھی غنی بنانے کی جو نسبت کی گئی ہے وہ اس وجہ سے ہے کہ حضور صلی اللہ علیہ وآلہ وسلم کی ذات اقدس، اللہ تعالیٰ کی ذات عالی سے نعمتوں اور برکتوں کے حاصل کرنے کا واسطہ ہے (چنانچہ حضور صلی اللہ علیہ وآلہ وسلم کا ارشاد گرامی ہے کہ اللہ تعالیٰ عطا کرنے والے ہیں، میں تقسیم کرنے والا ہوں)12

ف: اس حدیث شریف میں حضرت ابوبکر صدیق رضی اللہ عنہ کا یہ قول ہے کہ ”اگر وہ مجھ سے بکری کا ایک بچہ بھی روک رکھیں گے جسے وہ (زکات میں) رسول اللہ صلی اللہ علیہ وآلہ وسلم کو دیا کرتے تھے تو میں ان سے جہاد کروں گا“، واضح ہو کہ یہاں بکری کے بچے سے مراد حقیقتاً بکری کا بچہ نہیں ہے، کیوں کہ بکری کے بچے پر زکات واجب نہیں بلکہ یہاں یہ ظاہر کرنا مقصود ہے کہ چھوٹی سے چھوٹی چیز بھی مثلاً بکری کا بچہ ہی کیوں نہ ہو، جو پہلے زکات میں دیا جاتا تھا اور اب نہ دیا جائے تو اس کے لئے بھی جہاد کیا جائے گا (زکات میں وصول کئے جانے والے جانوروں کے بچوں سے متعلق مسائل آگے اپنے مقام پر آرہے ہیں)۔ (ماخوذ از: ہدایہ، ردالمحتار اور فتح القدیر)12

ف: اس حدیث شریف میں ارشاد باری تعالیٰ ہے ”وَالَّذِينَ يَكْنِزُونَ الذَّهَبَ وَالْفِضَّةَ”۔ (سورۃ توبہ، پ:10، ع:5، آیت نمبر:34) یعنی جو لوگ سونا اور چاندی بطور خزانہ جمع کر رکھے ہیں اور ان کو راہ خدا میں صرف نہیں کرتے، وہ دردناک عذاب کے مستحق ہیں اور ہر وہ مال جس پر زکات ادا نہ کی جائے، خواہ وہ زیور ہو یا غیر زیور وہ کنز ہے اور اس میں کوئی فرق نہیں کیا گیا ہے، اس لئے زیور بھی مال ہی کہلائے گا اور اس پر بھی زکات واجب ہوگی اور یہی مذہب حنفی ہے۔ دیگر یہ کہ زکات ادا نہ کر کے مال جمع کرنے والے سے یہ بھی وعید متعلق ہوگی جو صدر کی حدیث میں حضرت ابن عباس رضی اللہ عنہما سے مروی ہے اور وعید تو صرف ترک واجب یا ترک فرض پر ہی ہوتی ہے، اس سے بھی معلوم ہوا کہ مطلقاً مال پر زکات فرض ہے خواہ وہ زیور ہو یا غیر زیور۔ زیورات پر زکات فرض ہونے کی ایک اور دلیل رسول اللہ صلی اللہ علیہ وآلہ وسلم کا یہ ارشاد ہے ”وَأَدُّوْا زَكٰوةَ أَمْوَالِكُمْ طَيِّبَةً بِهَا أَنْفُسُكُمْ“ تم اپنے اموال پر (خواہ وہ سونا چاندی ہوں زیورات) خوشی خوشی زکات ادا کرو۔ حدیث شریف میں مطلقاً مال کا ذکر ہے اور یہ نہیں فرمایا گیا کہ فلاں مال پر زکات ہے اور فلاں مال پر زکات نہیں۔ مال خواہ سونا یا چاندی کی شکل میں ہو یا زیورات، یا دوسرے اموال کی شکل میں ہو، سب مال ہی کہلائے گا اور اس پر زکات واجب ہوگی، بشرطیکہ وہ نصاب کو پہونچتا ہو۔ زیورات پر زکات فرض ہونے کی ایک دلیل یہ بھی ہے کہ زیورات حاجت اصلی سے زائد ہوتے ہیں، کیوں کہ ان سے زیب و زینت مقصود ہوتی ہے اور یہی دلیل ہے ان کے حاجت اصلی سے زائد ہونے کی! لہذا زیورات بھی نعمت قرار پائے جو خوشحالی اور فارغ البالی کی دلیل ہیں۔ لہذا اس نعمت کا شکر اس طرح ادا کرنا چاہئے کہ ان زیورات میں سے حسب نصاب کچھ حصہ کو فقراء پر تقسیم کر دیا جائے، اس بناء پر زیورات پر بھی زکات واجب قرار دی گئی۔ (بدائع)

ف: اس حدیث شریف میں ارشاد ہے کہ عاملین زکات کو خوش رکھا جائے اگرچہ کہ وہ زیادتی کریں۔ اس بارے میں الاشباہ والنظائر کے فن ثالث میں مذکور ہے کہ زیادتی کرنے والا یعنی فاسق شہادت، قضاءت، امارت، حکومت اور امامت کی اہلیت رکھتا ہے اسی طرح فاسق، نابالغ اولاد کا ولی اور اوقاف کا متولی بن سکتا ہے اور فسق کی وجہ سے خود بخود معزول نہیں ہو جاتا، جیسے مذہب امام شافعی میں مذکور ہے۔ اور مذہب حنفی یہ ہے کہ ایسے فاسق کو معزول کر دینا امام یا حاکم کا ہی اختیار ہے وہ خود بخود معزول نہیں ہوتا۔12

ف: اس حدیث شریف میں مذکور ہے کہ حضور صلی اللہ علیہ وآلہ وسلم زکات لانے والے کے لئے ان الفاظ سے دعا فرماتے تھے ”اللّٰهُمَّ صَلِّ عَلٰى آلِ فُلَانٍ“ اس بارے میں ردالمحتار میں لکھا ہے کہ ”اللّٰهُمَّ صَلِّ عَلٰى“ کے الفاظ سے دعا کرنا حضور صلی اللہ علیہ وآلہ وسلم کے خصوصیات سے ہے۔ دوسروں کے لئے جائز نہیں ہے کہ انبیاء علیہم الصلوۃ والسلام کے سواء کسی اور پر صلوۃ کے لفظ سے دعاء کریں، ہاں امام یا زکات وصول کرنے والے کے لئے مستحب یہ ہے کہ وہ زکات دینے والے کے لئے اس طرح دعاء کرے: ”آجَرَكَ اللّٰهُ فِيْمَا أَعْطَيْتَ، وَبَارَكَ اللّٰهُ فِيْمَا أَبْقَيْتَ“ (خازن۔)12 تو نے جو مال (راہ خدا میں) دیا ہے، اللہ اس کا تجھے ثواب دے، اور جو مال (زکات ادا کرنے کے بعد) تیرے پاس رہ گیا ہے، اللہ تجھے اس میں برکت دے۔

اس حدیث شریف میں حضور صلی اللہ علیہ وآلہ وسلم کا ارشاد ہے کہ ”کیوں نہ اپنے ماں کے یا باپ کے گھر میں بیٹھ گیا کہ دیکھ لیتا کہ وہاں اس کو ہدیہ کا مال آتا ہے یا نہیں“؛ خطابی رحمۃ اللہ علیہ نے کہا ہے کہ اس ارشاد نبوی حضور صلی اللہ علیہ وآلہ وسلم میں دلیل ہے کہ ہر ایسی چیز جو کسی ممنوع یا ناجائز کام کا ذریعہ اور وسیلہ بنے وہ بھی ممنوع اور ناجائز ہے۔ شرح السنہ میں بھی ایسا ہی مذکور ہے، اور ملا علی قاری رحمۃ اللہ نے مرقات میں لکھا ہے کہ یہ کلیہ ہے کہ ”ایسی چیز جو کسی ناجائز کام کا ذریعہ بنے وہ بھی ناجائز ہے“ مذہب حنفی اور مذہب شافعی کے موافق ہے، کیوں کہ وسائل کا حکم مقاصد کا ہوتا ہے، جو چیز طاعت کا وسیلہ بنے وہ بھی طاعت ہی ہوگی، اور جو چیز معصیت کا ذریعہ بنے وہ بھی معصیت ہی ہوگی۔ اور ملا علی قاری رحمہ اللہ نے مرقات میں اسی حدیث شریف کے تحت ایک دوسرا کلیہ بھی بیان فرمایا ہے کہ ہر ایسا کام جو کسی ناجائز معاملہ سے (مثلاً سود وغیرہ سے) بچنے کے لئے اختیار کیا جائے تو ایسا کام جائز ہوگا۔ چنانچہ خیبر کے عامل زکات کو جن کے پاس کچھ ردی کھجور تھے اور وہ ان کو اچھے کھجور سے بدلنا چاہتے تھے (اور یہ معاملہ یعنی ردی کھجور کو اچھے کھجور سے بدلنا ربوا یعنی سود کی تعریف سود کی تعریف میں آتا تھا) تو حضور صلی اللہ علیہ وآلہ وسلم نے ان کو سودی معاملہ سے بچانے کے لئے اس طرح ہدایت فرمائی کہ وہ دو صاع ردی کھجور کو اولاً بیچ دیں اور اس کی قیمت سے ایک صاع اچھے کھجور خریدیں چوں کہ یہ معاملہ سود سے بچنے کے لئے بطور ذریعہ کے اختیار کیا گیا ہے اس لئے جائز ہوگا (اس وجہ سے کہ ایسا وسیلہ جو حرام یا ناجائز کام سے بچنے کے لئے اختیار کیا جائے جائز ہے اور یہی مذہب حنفی ہے۔ ف: اس حدیث شریف میں حضور صلی اللہ علیہ وآلہ وسلم نے عامل زکات کے ہدیہ لینے کو پسند نہیں فرمایا ہے، اس سے ثابت ہوتا ہے کہ ایسا ہدیہ جو حکومت کے اثر کی وجہ سے دیا جاتا ہو، اس کا قبول کرنا حرام ہے۔ ردالمحتار بحوالہ فتح اور صاحب مرقات نے اس کے عدم جواز کی دلیل یہ بیان کی ہے کہ عامل زکات کو صاحب مال اس وجہ سے ہدیہ دیتے ہیں کہ ان کے مال سے زکات کا کچھ حصہ چھوڑ دیا جائے جو ناجائز ہے اور دوسری وجہ یہ ہے کہ عامل کو اس کی خدمت کا معاوضہ مقرر ہے اور اس طرح کا ہدیہ بھی معاوضہ ہی متصور ہوگا اور اس صورت میں ایک خدمت کے دو معاوضے ہو جائیں گے جو جائز نہیں ہے۔12

ف: ترمذی کی دوسری روایت میں مذکور ہے کہ ”تم اپنے اموال پر زکات دیتے رہو“ اس بارے میں کوکب دری اور عرف الشذی میں لکھا ہے کہ اموال کی تین قسمیں ہیں، ایک وہ مال ہے جو مال تجارت کے منافع کے طور پر درمیان سال میں حاصل ہوا ہے، جیسے کسی کے پاس کچھ بکریاں ہیں اور درمیان سال میں اور بکریوں کا اضافہ ہوا تو چونکہ اصل اور اضافہ شدہ مال کی جنس ایک ہے تو اس پر سب کا اتفاق ہے کہ ایسے درمیان سال میں حاصل ہونے والے منافع کو اصل سرمایہ میں شامل کر کے ختم سال پر دونوں مال کی زکات ایک ساتھ ادا کی جائے۔ دوسرے وہ مال ہے جو موجودہ اموال کی جنس سے نہ ہو، جیسے کسی کے پاس تجارت کے اونٹ ہیں اور اس کو درمیان سال میں کچھ بکریاں بھی حاصل ہو گئیں تو اس پر بھی سب کا اتفاق ہے کہ ختم سال پر وہ صرف اونٹوں کی زکات دے کر بکریوں کو شامل نہ کرے، اس لئے کہ بکریاں غیر جنس سے ہیں، ہاں جب بکریوں پر ایک سال کی مدت گزر جائے تو وہ بکریوں کی علیحدہ زکات ادا کرے۔ تیسرے وہ مال ہے جو وراثت یا وصیت کے طور پر درمیان سال میں حاصل ہوا ہو، ایسے مال کے بارے میں امام اعظم اور امام مالک رحمہما اللہ فرماتے ہیں کہ اگر درمیان سال میں حاصل ہونے والا اور موجودہ مال دونوں جنس میں ایک ہوں تو اصل مال اور اضافہ شدہ مال دونوں کو ملا کر ختم سال پر دونوں کی زکات ایک ساتھ ادا کی جائے۔ اور امام شافعی اور امام احمد رحمہما اللہ فرماتے ہیں کہ درمیان سال میں حاصل ہونے والے مال پر بھی جب تک ایک سال پورا نہ گزر جائے زکات واجب نہیں ہوگی خواہ ایسا مال سابقہ مال کے ہم جنس ہو یا نہ ہو۔12

ف: واضح ہو کہ صدر کی دونوں حدیثیں جو حضرت طاؤس اور حضرت ثمامہ سے مروی ہیں ان سے امام اعظم رحمہ اللہ نے یہ ثابت کیا ہے کہ زکات میں نفس مال کے بجائے دوسری جنس لی جا سکتی ہے جیسے غلہ کے بجائے اسی قیمت کے کپڑے یا جانوروں کی زکات میں ایک جانور کے بجائے اسی قیمت کا دوسرا جانور۔ اس کی وجہ یہ ہے کہ ادائی زکات کا اصل تعلق صاحب زکات سے ہے۔ نفس مال سے نہیں، اسی لئے وہ اس مال کی زکات بصورت قیمت بھی ادا کر سکتا ہے اور یہی مذہب حنفی ہے اور اسی طرح صدقہ فطر، کفارہ، عشر خراج اور نذر میں بھی اصل جنس کی بجائے قیمت کا دینا جائز ہے اور یہی قول حضرت عمر فاروق، حضرت ابن عمر، حضرت ابن مسعود، حضرت ابن عباس، حضرت معاذ، حضرت ثوری اور امام بخاری کا ہے۔ ہدایہ، فتح القدیر اور اعلاء السنن میں بھی ایسا ہی مذکور ہے۔