Hadith 1752

ابو قتادہ رضی اللہ عنہ سے روایت ہے وہ فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا: خوب یاد رکھو کہ (کسی وقت) نیند کی وجہ سے کسی نماز کا وقت گزر جائے تو کوئی قصور نہیں (بروقت نماز نہ پڑھنے کا گناہ تو نہیں ہوگا مگر اس نماز کی قضاء کرنا ضروری ہوگا) البتہ بیداری میں (سفر (جیسا کہ جامع الآثار میں مذکور ہے۔12) کی وجہ سے نماز نہ پڑھ کر) اتنی دیر کیا کہ دوسری نماز کا وقت ہوگیا تو ایسا شخص قصور وار ہوگیا (اور اس پر اس نماز کی قضاء بھی لازم ہوگی اور گنہگار بھی ہوگا) (اس حدیث کی روایت مسلم نے کی ہے۔) اور مسلم کی ایک اور روایت میں ابو قتادہ رضی اللہ عنہ ہی سے اس طرح مروی ہے کہ نبی کریم صلی اللہ علیہ وآلہ وسلم نے ارشاد فرمایا کہ کسی وقت نیند کی وجہ سے (اگر کسی نماز کا وقت گزر جائے) اور نماز قضاء ہوجائے تو کوئی قصور نہیں، قصور تو اس شخص کا ہے جو بیدار رہ کر (جیسا کہ جامع الآثار میں مذکور ہے۔12 (سفر کی وجہ سے) کسی نماز کو وقت پر نہ پڑھ کر اتنی دیر کیا کہ دوسری نماز کا وقت آگیا (تو ایسا شخص گنہگار ہوگا اور اس کو نماز کی قضاء بھی کرنا پڑے گا ان حدیثوں سے معلوم ہوا کہ مسافر کو ایک نماز بے وقت کر کے دوسری نماز کے ساتھ جمع کرنا ہرگز جائز نہیں۔ اس طرح نمازوں کو جمع کرنے والا گنہگار ہوگا)۔ (اس حدیث کی روایت امام طحاوی نے بھی اسی طرح کی ہے۔)