Hadith 5349

حضرت عائشہ رضی اللہ تعالیٰ عنہا سے روایت ہے انہوں نے کہا: ایک شخص آیا اور وہ رسول اللہ صلی اللہ علیہ وسلم کے سامنے بیٹھ گیا اور عرض کیا: یارسول اللہ! میرے کچھ غلام ہیں جو مجھے جھٹلاتے ہیں اور میرے ساتھ خیانت کرتے ہیں اور میری نافرمانی کرتے ہیں اور میں انکو گالیاں دیتا ہوں اور مارتا ہوں پس میں ان سے متعلق کیسا ہوں، تو رسول اللہ صلی اللہ علیہ وسلم نے فرمایا: جب قیامت کا دن ہوگا تو حساب لگایا جائے گا اس کا جو انہوں نے تیرے ساتھ خیانت کی اور جو انہوں نے تیری نافرمانی کی اور جو انہوں نے تجھے جھٹلایا اور تیرے انکو سزا دینے کا، پس اگر تیرا انکو سزا دینا انکے جرائم کی بقدر ہے تو وہ تیرے لئے ”کفاف“ برابر برابر ہو جائے گا نہ تیرے لئے کچھ فائدہ ہوگا اور نہ تیرے خلاف نقصان، اور اگر تیرا انکو سزا دینا انکے جرائم سے کم ہو تو یہ تیرے لئے فضل کی چیز ہے2 اور اگر تیرا انکو سزا دینا انکے جرائم سے زیادہ ہو تو انکے لئے تجھ سے بدلہ لیا جائے گا، تو وہ شخص ہٹ گیا اور آہ و بکا کرنے اور رونے لگا تو رسول اللہ صلی اللہ علیہ وسلم نے اس سے ارشاد فرمایا: کیا تو اللہ تعالیٰ کا یہ ارشاد نہیں پڑھتا اور ہم بروز قیامت انصاف کی ترازو رکھیں گے پس کسی نفس پر کچھ بھی ظلم نہیں کیا جائے گا اور اگر وہ رائی کے دانے کے برابر بھی ہو تو ہم اسکو لائیں گے اور ہم حساب لینے کے لئے کافی ہیں؟ تو اس شخص نے کہا: یا رسول اللہ! میں اپنے لئے اور ان کے لئے ان کو چھوڑ دینے سے بہتر کوئی چیز نہیں پاتا، میں آپ کو گواہ بناتا ہوں یہ سب آزاد ہیں۔-(ترمذی)۔