(یہ باب ستر عورت (ستر ڈھانکنے کے بیان میں ہے)

ف: اس حدیث سے معلوم ہوتا ہے کہ کوئی شخص صرف تہ بند سے اس طرح نماز نہ پڑھے کہ اس کے جسم کا بالائی حصہ اس کے تہ بند کے حصے یا کسی اور کپڑے سے ڈھکا ہوا نہ ہو۔ واضح رہے کہ جو شخص تہ بند کے علاوہ اپنے جسم کے بالائی حصہ کو چادر یا کسی اور کپڑے سے ڈھانکنے پر قادر نہ ہو تو ایسے شخص کی نماز صرف تہ بند کے ساتھ بغیر کسی کراہت کے جائز ہو جائے گی البتہ ایسا شخص جو چادر کے اوڑھنے پر قدرت کے باوجود جسم کے بالائی حصہ پر کچھ اوڑھے بغیر صرف تہ بند کے ساتھ نماز پڑھ لے تو یہ مکروہ تنزیہی ہے نہ کہ تحریمی، امام مالک، امام ابو حنیفہ، امام شافعی اور جمہور رحمہم اللہ کا یہی مسلک ہے۔ (مرقات)۔

ف: اشتمال سے مراد یہ ہے کہ تہ بند کا بایاں کنارہ بائیں ہاتھ کے نیچے سے نکال کر سیدھے مونڈھے پر ڈالے اور تہ بند کا سیدھا کنارہ سیدھے ہاتھ کے نیچے سے نکال کر بائیں مونڈھے پر ڈالے، اگر کنارے چھوٹے ہوں تو دونوں کناروں کو گردن پر باندھے یا کناروں کو سینہ پر باندھے، اور اگر کنارے دراز ہوں تو ان کو پیچھے لٹکاتا ہوا چھوڑ دے توشّح بھی اسی کو کہتے ہیں، جیسے امام بخاری رحمۃ اللہ علیہ کی اس حدیث سے ثابت ہوتا ہے: ”وَقَالَ أَبُو حَازِمٍ عَنْ سَهْلِ بْنِ سَعْدٍ رَضِيَ اللّٰهُ عَنْهُ” صَلَّوْا مَعَ النَّبِيِّ صَلَّى اللّٰهُ عَلَيْهِ وَسَلَّمَ عَاقِدِي أُزُرِهِمْ عَلَى عَوَاتِقِهِمْ“۔ ابو حازم نے کہا کہ سہل بن سعد رضی اللہ عنہ سے روایت ہے کہ ان لوگوں نے نبی صلی اللہ علیہ وسلم کے ساتھ ایک کپڑے میں اس طرح نماز پڑھی کہ ان کے تہ بند کے (دونوں کنارے) ان کے گردن پر باندھے ہوئے تھے۔ (مرقات، اشعۃ اللمعات، نیل الاوطار)12

ف: اشتمال صماء سے مراد یہ ہے کہ نماز پڑھنے والا ایک کپڑے کو اپنے پورے جسم پر اس طرح لپیٹے کہ کپڑا کسی طرف سے نہ اٹھ سکے اور دونوں ہاتھ پھر اس کپڑے میں بے شکاف ٹھوس پتھر کی طرح کسے ہوئے ہیں اور ہاتھوں کو اس کپڑے کے نچلے حصے سے ہی باہر کیا جا سکتا ہو، اور جب ہاتھوں کو کسی ضرورت سے باہر نکالا جائے تو بے ستری کا اندیشہ رہتا ہو، اسی وجہ سے آنحضور صلی اللہ علیہ وسلم نے اشتمال کے اس طریقے سے منع فرمایا ہے۔ (عمدۃ القاری، مجمع البحار۔)12

ف: اس حدیث سے معلوم ہوتا ہے کہ ایک کرتے میں بلا تہ بند نماز پڑھنا جائز ہے بشرطیکہ گریبان میں گنڈی لگا دی جائے۔ واضح ہو کہ بوقت نماز نمازی پر ستر عورت فرض ہے، ستر عورت کی دو قسمیں ہیں:(1) ایک ستر کو دوسروں کی نظر سے بچانا (2) دوسرے ستر کو اپنی نظر سے بچانا۔ ستر کو دوسروں کی نظر سے بچانے کی بھی دو صورتیں ہیں:(1) ایک ستر کو اطراف سے بچانا، (2) دوسرے ستر کو نیچے سے بچانا۔ (1) ستر کو اطراف سے بچانے کا مطلب یہ ہے کہ مرد اور عورت پر نماز میں اپنے جسم کے جس قدر حصے کو کپڑے سے چھپانا فرض ہے اس پورے حصے کو کپڑے سے اس طرح چھپانا واجب ہے کہ چاروں طرف سے ستر کا کوئی حصہ دکھائی نہ دیتا ہو۔ (2) ستر نیچے سے چھپانے کا مطلب یہ ہے کہ اگر مرد تہ بند باندھے یا عورت ساڑی پہنے تو تہ بند یا ساڑی کا نچلا یعنی زمین کی طرف والا حصہ کھلا رہتا ہے اور تہ بند یا ساڑی کے اس نچلے حصے کے کھلے رہنے سے نماز پڑھنے میں کوئی حرج واقع نہیں ہوتا۔ اطراف ستر کو دوسروں کی نظر سے بچانے کی بھی دو حیثیتیں ہیں (1) ایک حقیقی، (2) دوسرے حکمی ’ستر حقیقی یہ ہے کہ کپڑے سے ستر پوشی کی جائے اور ستر حکمی یہ ہے کہ بغیر کسی کپڑے کے اندھیرے میں یا خالی جگہ یا صحراء میں جہاں لوگوں کی نظر نہ پڑتی ہو نماز ادا کی جائے تو ستر حکمی کی ان تینوں صورتوں میں اگرچہ نمازی کا ستر دوسروں کی نگاہ سے محفوظ ہے مگر یہ ستر حقیقی ہے اس لئے یہ ستر حکمی مفسد نماز ہے ،جب تک ستر کو کپڑے سے نہ چھپایا جائے ستر حقیقی نہیں ہوتا، اس لئے نمازی پر فرض ہے کہ اپنے ستر کو اندھیرے میں ہو یا خالی مکان میں ہو کپڑے سے چھپائے۔ اب رہا نماز میں ستر کو اپنی نظر سے بچاؤ تو یہ واضح رہے کہ نمازی حالت میں اگر خود نمازی کی نگاہ اپنی ستر پر پڑ جائے تو اس سے نماز فاسد نہیں ہوتی البتہ مکروہ ہو جائے گی۔ چنانچہ منیہ میں امام ابوحنیفہ اور امام ابویوسف رحمہما اللہ سے یہی روایت ہے۔ اس حدیث میں حضور صلی اللہ علیہ وسلم نے سلمہ بن الاکوع رضی اللہ عنہ کو ان کی نظر سے ستر کو بچانے کی خاطر جو حکم دیا ہے کہ کرتے کے گریبان میں گنڈی لگائی جائے تو اس سے مقصود اسی کراہت سے بچانا ہے اس طرح ثابت ہوتا ہے کہ بحالت نماز نمازی کی نگاہ اس کے ستر پر پڑ جائے تو اس سے نماز فاسد نہیں ہوتی البتہ مکروہ ہوجاتی ہے۔ (درمختار، ردالمحتار، شرح منیہ۔)

ف: سدل کے معنی یہ ہیں کہ نمازی چادر یا رومال کو اپنے کندھوں پر اس طرح ڈالے کہ دونوں کناروں کو لٹکتا ہوا چھوڑ دے اور وہ سمٹے ہوئے نہ ہوں، یا قبا اور عباء کو اس طرح اوڑھ لے کہ اس کے آستینوں میں ہاتھ نہ ڈالا جائے یا ایک چادر یا کسی کپڑے میں سارے بدن کو اس طرح لپیٹ لے کہ دونوں ہاتھ اسی چادر یا کپڑے میں داخل کرلے ہوں جیسا کہ یہود کا دستور تھا، ان چیزوں سے نماز مکروہ ہوتی ہے۔ (مرقات اشعۃ اللمعات۔) اور عمدۃ الرعایۃ میں لکھا ہے: ”فان ارسل جانبا وضمه جانبه الآخر والقاه على منكبه فليس بسدل“۔ اگر چادر کے ایک کنارے کو لٹکتا ہوا چھوڑ دے اور دوسرے کنارے کو سمیٹ کر دوسرے کندھے پر ڈال دیا جائے تو یہ سدل نہیں کہلائے گا اور اس سے نماز مکروہ نہیں ہوتی۔

ف(1): ملّا علی قاری رحمۃ اللہ علیہ نے کہا ہے کہ حالت نماز میں ہوں یا نماز کے باہر ہوں ہر دو صورتوں میں امام ابوحنیفہ اور امام شافعی رحمہما اللہ کے پاس تہبند یا پاجامہ کو ٹخنوں سے نیچے لٹکانا مکروہ ہے اور ردالمحتار میں ہے کہ مردوں کیلئے ایسے پاجاموں کا پہننا مکروہ ہے جن کے کنارے پنجوں پر گرتے ہوں۔ ف(2): اس حدیث میں حضور صلی اللہ علیہ وسلم نے ارشاد فرمایا: ”إِنَّ اللَّهَ لَايَقْبَلُ صَلٰوةَ رَجُلٍ مُسْبِلٍ إِزَارَهُ“۔ (اللہ تعالیٰ) اس شخص کی نماز قبول نہیں فرماتے جو اپنے تہبند کو ٹخنوں سے نیچے لٹکائے ہوئے نماز پڑھتا ہے۔ واضح ہو کہ یہاں ٹخنوں کے نیچے تہبند کے لٹکانے پر نماز کے قبول نہ ہونے کا ارشاد ہوا ہے اور نماز کے صحیح نہ ہونے کا ارشاد نہیں ہوا، جس سے ثابت ہے کہ نماز میں ٹخنوں سے نیچے تہبند یا پاجامہ کو رکھنے سے نماز مکروہ ہوتی ہے اور فاسد نہیں ہوتی۔ چنانچہ امام ابوحنیفہ اور امام شافعی رحمہما اللہ نے تہبند یا پاجامہ کو ٹخنوں سے نیچے رکھ کر نماز ادا کرنے پر نماز کی کراہت کا حکم لگایا ہے نماز کے فساد کا حکم نہیں لگایا۔ اس حدیث میں اس شخص کو جو ٹخنوں سے نیچے تہبند لٹکائے ہوئے نماز ادا کر رہا تھا حضور صلی اللہ علیہ وسلم نے یہ بھی ارشاد فرمایا: ”اذْهَبْ فَتَوَضَّأْ‘‘، (جاؤ اور وضوء کرلو) یہاں حضور صلی اللہ علیہ وسلم نے اس شخص کو اس کے باوضوء ہونے کے باوجود دوبارہ وضوء کرنے کا جو حکم ارشاد فرمایا ہے اس کی ایک غرض یہ تھی کہ اس شخص نے تہبند کو ٹخنوں سے نیچے رکھے ہوئے جو نماز ادا کی ہے اس کا گناہ معاف ہوجائے اس لئے کہ وضوء سے صغیرہ گناہ معاف کر دیئے جاتے ہیں، علاوہ ازیں اس شخص کو دوبارہ وضوء کرنے کا جو حکم دیا گیا ہے اس کی دوسری غرض یہ تھی کہ اس شخص نے اپنے تہبند کو ٹخنے سے نیچے رکھ کر اپنے باطن میں کبر و غرور کی جو گندگی پیدا کرلی تھی وہ اس دوبارہ وضوء سے زائل ہوجائے اور اس طرح اس طہارت ظاہری سے اس کو طہارت باطنی حاصل ہوجائے کہ ظاہر کا باطن پر اثر پڑتا ہے۔ (یہ مضمون مرقات اور اشعۃ اللمعات سے ماخوذ ہے۔)12

ف: اس حدیث سے امت کو یہ تعلیم دی جا رہی ہے کہ نماز کے موقع پر ایسے لباس کے پہننے سے باز رہیں جس سے دل بٹ جاتا ہو۔ (مرقات، اشعۃ اللمعات۔)

ف: واضح ہو کہ حضور صلی اللہ علیہ وسلم کا ریشمی قبا پہن کر ناگواری کا اظہار فرمانا اس زمانہ کا واقعہ ہے جب کہ مردوں کیلئے ریشم پہننے کی حرمت کا حکم ابھی نہیں آیا تھا لیکن جب حکم آ گیا تو مردوں کیلئے ریشم کا پہننا حرام ہو گیا خواہ متقی ہوں یا غیر متقی۔(مرقات،اشعۃ اللمعات)۔

ف: اس حدیث سے دو چیزیں ثابت ہوتی ہیں، ایک(1) یہ کہ نماز ادا کرتے وقت نمازی کے لباس پر یا نمازی کے سامنے تصویریں نہیں ہونی چاہیئے اس لئے کہ حضور صلی اللہ علیہ وسلم نے تصویروں کو نکال دینے کا حکم فرمایا ہے،(2) دوسرے یہ کہ نمازی کے سامنے یا لباس پر تصویریں ہونے سے نماز مکروہ ہوتی ہے، فاسد نہیں ہوتی، کیوں کہ حضور صلی اللہ علیہ وسلم کے سامنے نماز کی حالت میں تصویریں تھیں تو آپ نے ان کو نکالنے کا حکم دیا مگر نماز کا اعادہ نہیں فرمایا، چونکہ حضور صلی اللہ علیہ وسلم نے نماز کا اعادہ نہیں فرمایا، اسی وجہ سے نماز کے فاسد ہو جانے کا حکم نہیں لگایا جائے گا بلکہ نماز کے مکروہ ہونے کا حکم لگایا جائے گا، امام ابو حنیفہ رحمہ اللہ کا یہی مذہب ہے۔(عمدۃ القاری)

(اس کی روایت دارقطنی نے کی ہے، یہ ایک طویل حدیث کا ایک حصہ ہے اور اس کی سند میں سوار بن داؤد ہیں جن کو عقیلی نے ضعیف قرار دیا ہے؛ لیکن امام ابن معین ان کو ثقہ قرار دیتے ہیں)۔ (ابن معین فن رجال کے امام ہیں اس لئے ان کا قول معتبر ہے۔)

ف: اس حدیث سے ثابت ہوتا ہے کہ باریک تنزیب یا جالی وغیرہ کا بہت باریک دوپٹہ اوڑھ کر نماز پڑھنا درست نہیں، یہ اس وقت ہے جب کہ اس کپڑے میں سے بدن دکھائی دیتا ہے اور اگر جتنے بدن کا ڈھانکنا ضروری ہے اس کو دوسرے کپڑے سے ڈھک لیا گیا اور اس کے اوپر سے باریک دوپٹہ بھی اوڑھ لیا جائے تو نماز ہو جائے گی۔ (منیہ اور درمختار۔)

ف: اس حدیث سے ثابت ہوتا ہے کہ عورت جو باندی نہ ہو، اگر وہ نماز پڑھتے وقت سر نہ ڈھانکے تو اس کی نماز ادا نہیں ہوگی اس لئے کہ عورت کا سر اور اس کے بال ستر میں داخل ہیں، اسی بناء پر سر اور بالوں کا چھپانا فرض ہے، عورت کی نماز ایسے باریک کپڑوں میں بھی صحیح نہیں جن میں اس کے بالوں کا رنگ یا بدن دکھائی دیتا ہو یہ بھی بے ستری میں داخل ہے۔ (اللمعات۔)

ف: اس حدیث سے ثابت ہوتا ہے کہ عورت کیلئے پشت قدم کو چھپانا فرض ہے (پشت قدم تلوے) اسی لئے امام ابوحنیفہ رحمہ اللہ علیہ نے فرمایا کہ عورت کے قدم بھی ستر میں داخل ہیں، اور اس حدیث کی وجہ سے امام شافعی رحمہ اللہ بھی اسی کے قائل ہیں۔ (یہ شرح الوقایہ میں مذکور ہے۔) عورت کا قدم ستر میں داخل ہونے کی وجہ سے خانیہ میں کہا ہے کہ نماز کے وقت عورت کے قدم کا چوتھائی حصہ دکھائی دینے سے نماز نہیں ہوگی جیسا کہ جسم کے دیگر اعضاء کا چوتھائی حصہ نظر آنے سے نماز جائز نہیں ہوتی ہے۔ البتہ نماز میں قدم یا کسی اور عضو کا چوتھائی حصہ سے کم حصہ دکھائی دے تو نماز ادا ہوجائے گی۔ (مرقات، عمدۃ الرعایۃ)۔

ف: اس حدیث سے معلوم ہوتا ہے کہ جوتے اور موزے پہن کر نماز پڑھنا دو شرطوں کے ساتھ مباح ہے، پہلی شرط یہ ہے کہ جوتے اور موزے پاک ہوں اور دوسری شرط یہ ہے کہ جوتا یا موزہ یا چپل اس قسم کے ہوں کہ سجدہ کی حالت میں پیروں کی تمام انگلیاں زمین پر ٹک جاتی ہوں۔ واضح ہو کہ ان شرطوں کے باوجود بھی جوتا یا چپل اتار کر نماز پڑھنا مستحب ہے، اس لئے کہ حضور صلی اللہ علیہ وسلم کا آخری عمل جوتے اتار کر نماز پڑھنا تھا۔ اب رہا یہود کی مخالفت تو حضور اکرم صلی اللہ علیہ وسلم کے عہد مبارک میں یہود اپنی نماز جوتا اور چپل نکال کر پڑھتے اور جوتے اور چپل پہن کر نماز پڑھنے کو جائز نہیں سمجھتے تھے اسی لئے حدیث میں ارشاد ہوا کہ یہود کی مخالفت میں جوتا اور چپل پہن کر نماز پڑھو، لیکن اس زمانے میں یہود و نصاریٰ اپنی اپنی نماز جوتے اور موزے پہنے ہوئے پڑھتے ہیں، اس لئے اس زمانے میں ان کی مخالفت یہ ہے کہ نماز جوتا اور چپل کے بغیر پڑھی جائے۔ (مرقات، عمدۃ القاری۔)

ف: نماز شروع کرنے سے پہلے کئی چیزیں واجب ہیں، ان میں سے خفین اور نعلین کا بھی نجاستوں سے پاک ہونا شرط ہے، اس لئے ان میں سے کسی پر کوئی نجاست لگی ہو تو اس کو پاک کر دیا جائے اگر نجاست پاک نہ کی گئی تو نماز جائز نہیں ہوگی۔ اس لحاظ سے اس حدیث شریف میں جو واقعہ مذکور ہے اس پر بظاہر یہ شبہ ہوتا ہے کہ نبی صلی اللہ علیہ وسلم نماز میں تھے اور جبرئیل علیہ السلام کے اطلاع دیئے پر آپ نے نعلین اُتار دیئے جن کو قذر یعنی نجاست لگی ہوئی تھی اور نماز کا اعادہ نہیں فرمایا حالانکہ مذکورہ بالا شرط کے لحاظ سے نماز کا اعادہ ضروری تھا۔ اس شبہ کے دو جواب ہیں: پہلا جواب یہ ہے کہ اس حدیث میں قذر کا لفظ واقع ہوا ہے جس کے معنی نجاست کے نہیں بلکہ ایسی چیز کے ہیں جس سے طبیعت کو ناگواری ہوتی ہے جیسے رینٹھ وغیرہ، چونکہ حضور صلی اللہ علیہ وسلم کی نعلین مبارک کو ایسی ہی چیز لگی تھی اسی لئے آپ نے نماز کا اعادہ نہیں فرمایا۔ دوسرا جواب یہ ہے کہ اگر نعلین مبارک کو نجس چیز ہی لگی ہوئی تھی تو وہ مقدار درہم سے کم تھی جس سے نماز ادا ہو جاتی ہے اور اعادہ کی ضرورت باقی نہیں رہتی اور جبرئیل علیہ السلام کا حضور صلی اللہ علیہ وسلم کو نماز میں اطلاع دینا آپ کی لطافت طبع کی وجہ سے تھا تا کہ آپ نعلین مبارک اُتار دیں اور نماز اکمل طریقہ سے ادا ہو جائے۔ (مرقات: اشعۃ اللمعات۔)